Makamadda Ciidamada PL oo sii daysay Eedaysanayaal dambi lagu waayey

Isniin, June 09, 2014 (HOL) —Maxkamadda ciidamada qalabka sida ee Puntland ayaa amar ku bixisay in lasii daayo siddeed eedaysane oo bishii April ee lasoo dhaafay dabayaaqadeedii loo soo qabtay  inay ku lug lahaayeen qarax fashilmay oo ka dhacay xaafadda Raxiis ee magaalada Boosaaso islamarkaana ay ka tirsan yihiin Ururka Al-shabaab.

Guddoomiyaha Maxkamadda -laanteeda gobollada Bari, Karkaar, Sanaag iyo Haylaan- Cabdifataax Xaaji Aadan, oo maanta magaalada Boosaaso warbaahinta shir-jaraa'id ugu qabtay, ayaa sheegay in siddeeda qof ee eedeysaneyaasha ah ay maxkamaddu go'aamisey in lasii daayo kaddib markii wax dembi ah lagu waayey.

Eedeysaneyaasha oo labo kamid ahi ay dumar ahaayeen, waxay qaar kamid ah oo warbaahinta la hadlay sheegeen inay si aad ah ugu faraxsan yihiin in dib mark kale xoriyaddooda loo siiyo kaddib markii ay xirnaayeen muddo labo bilood ku dhow.

Dadka ay maanta maxkamaddu dib xoriyaddooda ugu soo celisey waxa lagu kala magacaabaa:
  1. Saynab Cabdirisaaq Ciise.
  2. Faadumo Maxamed Cismaan.
  3. Maxamud Maxamed Cismaan.
  4. Maxamed Cali Cabdule.
  5. Cali Maxamed Cali.
  6. Cabdinaasir Badal.
  7. Khaliif Maxamed.
  8. Cabdulaahi Maxamed Axmed.
Qarax ka dhacay April 29, 2014 guri ku yaalla xaafadda Raxiis ee waqooyiga magaalada Boosaaso, qaraxaas oo hal qof oo kii xirayey ahaa uu ku dhaawacmay, waxaa ciidamada ammaanka oo daqiiqado kaddib halkaas gaarey ay soo qabteen 12 qof oo sideedda maanta lasii daayey ay ku jireen.

Maxamed Salaad Xaaji Dirir, Hiiraan Online
[email protected]
Puntland, Soomaaliya

More News