Hoobiyayaal lagu weeraray Garoonka Diyaaradaha Magaalada Beledweyne iyo Xerada Jante-kuundisho

Axad, 27, July, 2008 (HOL) Hoobiyayaal dhowr ah ayaa maanta lagu weeraray Garoonka Diyaaradaha Magaalada Beledweyne iyo Xerada ay degan yihiin Ciidamada Itoobiya ee Jante-kuundisho sida ay HOL u xaqiijiyeen dad goob joogayaal ah.
 
Weerarradan ayaa ku soo beegmay labo maalmood kadib dagaal culus oo gudaha magaalada Beledweyne ku dhaxmaray Ciidamada Itoobiya iyo Kooxaha ka soo horjeeda, waxaana wararku intaas ku darayaan in weerarka lagu qaaday Garoonka diyaaradaha uu sababay dhaawaca Sadax Ruux oo rayid ah.
 
Waxaa markiiba bilawday weerarka kadib in halkaas ay isaga cararaan dadkii  ka dhawaa goobaha la weeraray, gaar ahaan garoonka diyaaradaha oo ka mid ah goobaha ay sida weyn u gaareen dadkii isaga cararay dagaalkii ka dhacay Magaalada Beledweyne.
 
Weerarka lagu qaaday Xerada Ciidamada Itoobiya ee Jante-kuundisho ayaa muujinaya in wali xaaladdu aysan aheyn mid laysku haleyn karo, inkastoo uu jiro dadaal ay wadaan Odayaasha dhaqanka Gobalka oo si weyn ugu howlan in mar kale aan lagu dul dagaalamin dadka rayidka ah.
 
Sikastaba arrintu ha ahaatee, lama oga halka ugu dambeytii xaaladdu saldhigan doonto maadaama Saraakiisha Maxkamadaha Gobalka Hiiraan ku dhawaaqeen dagaal ay la gali doonaan Ciidamada Itoobiya inta ay ku sugan yihiin gudaha Magaalada Beledweyne.
 
C/raxmaan Diini, Hiiraan Online
[email protected]
Beledweyn, Somalia