Puntland oo markii ugu horeysay Sheybaar u adeegsan doonta Kiisaska la xiriira Kufsiga
Jimco, September, 15, 2017 (HOL) – Sheybaarkan oo noqonaya
kii ugu horeeyay ee noociisa ah ayaa la sheegay in lagu baari doono Kiisaska la
xiriira Kufsiga kaddib markii uu maamulka Puntland meel mariyay sharci ciqaab dul dhigaya kuwa gala danbiyada la xiriira Kufsiga.
Hey’adaha xuquuqda aadanaha ayaa sheegay in Soomaaliya ay
ka mid tahay dalalka ugu badan ee ay ka dhacaan tacaddiyada kufsiga loo geysto
haweenka.
Tan iyo markii uu dhaqan galay sharcigan maxkamadaha
Puntland ayaa la sheegay in ay qaadeen 63 Kiis oo la xiriira falal Kufsi ah,
waxaana 35 ka mid ah Kiisaskan natiijadoodu noqotay Xabsi, Ganaax iyo in
danbiilayaasha meel fagaaro ah lagu Karbaasho.
Salaax Xabiib Xaaji Jaamac oo ah wasiirka Cadaalada
Puntland ayaa sheegay in Sheybaarkan oo la dhigay Garoowe gacan siin doono
laamaha amniga isaga oo Yiri’’ Markii hore waxaan u diri jirnay Dheecaanka lagu
baaro Hide sidaha, Nairobi iyo Koonfur Africa, Jawaabtu waxaa ay qaadan jirtay,
Maalmo ama mar marka qaar Bilo, laakiin hadda waxaan jawaabta ku heli karnaa
Daqiiqado ama Saacado gudahood’’
Maryan Axmed Cali oo ah wasiirka Haweenka Puntland ayaa
rajo badan ka qabta Sheybaarkan waxaana ay Tiri’’ Ma noqon doonto Arin lagu
jahwareero Kumaa danbiga geystay iyo Yaa Kufsiga ku kacay waa Dhiiri-galin
weyn’’
Sheybaarkan oo noqonaya kii ugu horeeyay ee noociisa ah
ee Kufsiga ayaa waxaa siweyn u soo dhaweeyay qeybaha kala duwan ee bulshada
gaar ahaan haweenka oo la kulma tacadiyada ugu badan ee Kufsiga la xiriira.
C/raxmaan Diini, Hiiraan Online
[email protected]