Wararka Maanta: Sabti, Mar 25, 2017-Wafdi ka socday Gudiga Amniga iyo nabadgelyada Midowga Afrika oo gaaray magaalada Kismaayo

Wafdi ka socday Gudiga Amniga iyo nabadgelyada Midowga Afrika oo gaaray magaalada Kismaayo

Sabti, Maarso, 25, 2017 (HOL) –Wafdigan oo uu horkacayay gudoomiyaha gudiga amniga iyo nabadgelyada Midowga Afrika Ndumiso Ntshinga ayaa markii ay kasoo dageen garoonka diyaaradaha magaalada Kismaayo, waxaa halkaasi si diiran ugu soo dhaweeyay Madaxweeyne kuxigeenka 1-aad ee dowlad goboleedka Jubaland Mudane Maxamuud Sayid Aadan.

Wafdigan oo ah kii ugu ballaarnaa ee ka socda Midowga Afrika ee Kismaayo yimaada ayaa waxaa qeyb ka ahaa dhammaan safiirada 15-ka dal ee xubnaha ka ah ururkaasi.

Soo dhaweyn kadib waxa ay masuuliyiintani oo uu wehlinayo madaxweeyne kuxigeenka ay booqdeen xarumo lagu tababarayo ciidamada Booliska Soomaaliyeed qeybtooda Jubaland, ayagoo intaa kadib la geeyay guriga Martida ee magaalada Kismaayo, halkaa oo ay kulan kula qaateen Madaxweeynaha Jubaland Mudane Axmed Max’ed Islaam.

Madaxweeynaha Jubaland oo kulanka markii uu soo idlaaday warbaahinta la hadlay ayaa sheegay in Masuuliyiintan ay ka wada hadleen arimo ku saabsan amniga, isagoo sheegay in sidoo kale ay ka wada hadleen sidii ay Midowga Afrika uga qeybqaadan lahaayeen dhismaha ciidamada qaranka Soomaaliyeed.

Gudoomiyaha gudiga amniga iyo nabadgelyada Midowga Afrika Ndumiso Ntshinga ayaa sheegay in uu aad ugu faraxsanyahay nabadda iyo horumarka ka jira magaalada Kismaayo, isagoo xusay in ujeedka safarkooda ahaa sidii ay madaxda Jubaland ugala hadli lahaayeen in la dardar gelin lahaa nabadgelyada, islamarkaana looga qeybqaadan lahaa dhismaha ciidamada qaranka Soomaaliya.

Imaatinka wafdigan ayaa kusoo beegmaya xilli dowladda Soomaliya ay wado dadaallo la doonayo in dib loogu dhiso ciidamadii qaranka Soomaaliyeed, si ay ula wareegaan amniga guud ee dalka.

Xasan Nuur, Hiiraan Online
[email protected]
Kismaayo-Soomaaliya.