Sabti, Maarso, 25, 2017 (HOL) –Madaxweynaha
Dowladda Mareykanka Donald Trump iyo xisbigiisa Jamhuuriga ayaa guuldarro kala
kulmay in la bedelo barnaamijkii adeega caafimaadka ee Obamacare, kaasoo uu
horay u balanqaaday inuu meesha ka saari doono intii uu ku guda jiray ololihii
doorashada.
Hindise sharciyeed uu soo diyaariyay oo ku saabsanaa daryeelka caafimaadka
ayaa heli waayay taageeradii uu uga baahnaa Aqalka Congress-ka, si loo
horgeeyo.
Donald Trump ayaa sheegay inuu la yaabay, kana niyad jabay sharci la
doonayay in lagu bedelo adeega caafimaadka ee Obamacare.
Waxaa uu ku eedeeyay Xisbiga Dimoqraadiga inay ka dambeeyaan fashilka ku
yimid hindise sharciyeedkiisa uu doonayay in lagu bedelo kii Obamacare ee horay
loo meel mariyay.
Ugu danbeyntii, xisbigiisa Jamhuuriya ayaa dib ula laabtay hindise
sharciyeedka, ka hor inta uusan u codeyn, iyadoo ay cadaatay inuusan heysan
taageero.
C/raxmaan Diini, Hiiraan Online
[email protected]