Madaxweynaha Hirshabeelle oo sheegay in hoos loo daadajinayo awooda maamulka + Video
Sabti, Maarso, 25, 2017 (HOL) - Madaxweynaha dowlad gobolleedka Hirshabeelle
Cali Cabdullaahi Cosobole iyo xubno ka tirsan gollaha wasiirada maamulka oo
maanta gaaray magaalada Beledweyne ayaa sheegay in awood maamulka hoos loo
daadajin doono.
‘’Waqti badan kuma lumin doonno in aan Jowhar ku uruursanaanno, nidaamka
federaalka hoos ayaan u daadajin doonnaa laga bilaabo saacadan, waxaan rabaa in
aan idin sheegno magaalada Beledweyne waxaa ka shaqeyn doona dhamaan xarumaha
wasaarradaha oo ay ka faa’ideysan doonaan dhalinyarrada wax baratay’’ ayuu yiri
madaxweynaha maamulka Hirshabeelle oo ka hadlayay munaasabad soo dhaweyn ah
loogu qabtay xarunta maamulka gobollka.
Madaxweynaha maamulka Hirshabeelle ayaa intaa ku darray in magaalada Jowhar
ay ku shaqeyn doonaan xubno kooban oo golle wasiiro ah, hasse ahaatee shaqada
wasaarradaha intooda badan loo soo wareejin doono sida uu hadalka u dhigay
magaalada Beledweyne.
‘’Ma rabno in qof kasta oo shaqo doon ah uu Jowhar tago, halkan [Beledweyne] ayeey ka
shaqeyn doonaan inta badan wasaarradaha maamulka si dadka looga faa’ideeyo’’ ayuu
hadalkiisa sii raaciyay.
Socdaalka ayaa noqonaya kii labaad oo magaalada Beledweyne uu ku tago
madaxweynaha maamulka Hirshabeelle tan iyo markii xilka loo doortay.
C/raxmaan Diini, Hiiraan Online
[email protected]
