Jimco, Maarso, 24, 2017 (HOL) – Madaxweynaha dowladda Soomaaliya Maxamed Cabudallaahi Farmaajo ayaa isaga oo ku sugan magaalada Nairobi waxaa uu khadka isgaarsiinta leyska arko uga qeyb-gallay shirka gollaha amaanka oo looga hadlay xaalada bani'aadannimo ee Soomaaliya.
Madaxweynaha ayaa ugu horeyn sheegay in doorashooyinkii
dhawaan ka qabsoomay dalka si nabad ah u dhaceen, isaga oo intaa ku darray in taariikhda inta la xasuusto haweenka
Soomaaliyeed baarlamaanka ku leeyihiin 30%.
Sidoo kale madaxweyne Farmaajo ayaa gollaha amaanka u
sheegay in uu rajo wanaagsan ka qabo in baarlamaanka Soomaaliya codka
kalsoonida siiyaan gollaha wasiirada cusub ee dhawaan lagu dhawaaqay.
‘’Waxaan rajo wanaagsan ka qabaa in baarlamaanka uu meel
marin doono gollaha cusub ee wasiirada si aan wada jir u bilaawno howsha la
dagaalanka abaarta darran ee dalka ka jirta’’ayuu yiri Madaxweynaha Soomaaliya
Maxamed Cabdullaahi Farmaajo.
Mar uu soo hadal qaaday saameynta abaarta ayuu sheegay in
kala bar shacabka Soomaaliyeed ay wajahayaan xaalad bani’aadannimo oo darran,
halka 15% ay la ildaran yihiin macaluul ka dhalatay abaarta, isaga oo ugu
baaqay beesha caalamka in ay sida ugu dhaqsiyaha badan arintan uga jawaabaan.
‘’Waxaan si naxriis leh u weydiisaneynaa dhamaan kuwa
taageera aritan in ay gacan ka geystaan, ma’aha oo kaliya in ay Soomaalidu
xasuusan doonto saacidaadiina, laakiin waxaa ay noqon kartaa arin taariikhi ah’’
ayuu yiri madaxweyne Farmaajo.
Ugu danbeyntii, kulanka xubnaha gollaha amaanka ayaa waqti
kordhin loogu sameeyay howlgalka UNSOM ee Soomaaliya.
C/raxmaan Diini, Hiiraan Online
[email protected]