Jimco, Maarso, 24, 2017 (HOL) – Dowladda Turkiga ayaa maanta
garoonka diyaaradaha magaalada Muqdisho ka dajisay hal tan oo gaar gaar cuno
ah oo loogu talagalay dadka ay abaaruhu saameeyeen ee ku dhibaateysa gobollada
dalka Soomaaliya.
Gargaarkan oo ay ku deeqday hay’adda Bisha cas ee Turkiga
ayaa waxaa lagu wareejiyay gudiga gurmadka Qaran ee abaaraha si markaa uu qeyb
uga noqdo dadaallada lagu caawinayo dadka ay abaartu saameysay.
Raashinkan ayaa u badan nafaqada caruurta, madaama baqdinta
ugu weyn ee la qabo tahay macaluul ka dhalatay nafaqo darro soo food saartay
carruurta ku dhaqan ilaa 11 gobol oo ka mid ah 18ka gobol ee Soomaaliya, taa oo sababi karta marka danbe dhimasho
baahsan.
Dowladda Turkiga ayaa dhawaan sheegtay in tan iyo sanadii 2011 ay Soomaaliya
ku bixisay lacag dhan hal bilyan oo dollar.
Ugu danbeyntii, marka laga soo tago
deeqdan ka timid dowladda Turkiga, dhinaca kale waxaa soconaya dadaalo kala
duwan oo ay wadaan hay’addo caalami ah iyo dadka Soomaaliyeed ee ka damqanaya
daruufaha nolaleed ee la soo darsay dadka abaartu saameyeen.
C/raxmaan Diini, Hiiraan Online
[email protected]