Dagaal maqribnimadii caawa ka dhacay Muqdisho

Khamiis, September 03, 2009(HOL): Dagaal u dhaxeeyay Ciidamada Burundi ee fariisinka ku leh Kuliyaddii Jaalle Siyaad iyoXoogag hubeysan oo ka soo  horjeedaa ayaa wuxuu caawa maqribnimadii ka dhacay nawaaxiga Kuliyaddii Jaalle Siyaad ee Magaalada Muqdisho.

Dagaalka oo ahaa mid xooggan ayaa wuxuu qarxay kaddib markii ay xoogagga ka soo horjeeda Ciidamada Amisom iyo Dowladda Soomaaliya ay weerar ku qaadeen Fariisimada ay Ciidamada Amisom, gaar ahaan kuwa ka socda Dowladda Burundi ay ku leeyihiin Kuliyaddii Jaalle.

Inta la xaqiijiyay dagaalkan ayaa wuxuu geystay dhimashada 5 ruux iyo dhaawac tiro dad ah oo intaas ka sii badan, kuwaasi oo dhamaantood ahaa dad rayid ah oo ay xaafadahooda ugu tageen madaafiic ay dhinacyada dagaallamay isweydaarsadeen. Xaafadaha ay Dadka ku dhinteen ayaa waxay ka tirsan yihiin Degmooyinka Hodan iyo Dayniile.

Dagaalkan ayaa wuxuu qalqal iyo cabsi ku abuuray dad badan oo ku nool degmooyinka Hodan iyo Dayniile, kuwaasi oo xiliga dagaalka bilaabanayay isu diyaarinayay in ay afuraan bacdamaa ay maanta oo dhan soomanaayeen.

Tan iyo wixii ka dambeeyay markii ay bilaabatay bisha ramadaan waxaa xiliga afurkii dhaca dagaal u dhaxeeya Ciidamada Dowladda Soomaaliya iyo kuwa Amisom oo isku dhinac ah iyo Xoogagga hubeysan ee ka soo horjeeda, iyadoo dagaalladaasna ay mararka qaarkood geystaan khasaare dhimasho iyo dhaawac isugu jira.

Mas’uuliyiin u hadlay dhinacyada hubeysan ee ka soo horjeeda Dowladda Soomaaliya ayaa waxay horay u sheegeen in inta lagu guda jiro bisha Ramadaan ay sii kordhin doonaan dagaallada ay ku qaadaan fariisimada Dowladda Soomaaliya iyo kuwa Ciidamada Amisom.

Salaad Iidow Xasan (Xiis), Hiiraan Online
[email protected]
Muqdisho, Soomaaliya