Midowga Yurub oo todobaadka dambe ka doodaya Ciidamo uu u tababaro Dowladda Soomaaliya

Jimco, November 13, 2009(HOL): Midowga Yurub ayaa lagu wadaa in uu ka doodo todobaadka soo socda qorshe uu tababar ku siinayo ciidamo ay leedahay Dowladda Soomaaliya oo gaaraya 2,000 oo Askari.

Qorshahan ayaa waxaa ka doodi doona Wasiirrada Arrimaha Dibadda iyo Gaashaandhigga ee Dalalka Midowga Yurub, iyadoo ay qorshahaas soo jeediyeen qaar ka mid ah dalalka midowga Yurub.

Haddii qorshahan uu meel-mariyo Midowga Yurub ayaa waxaa Dowladda Soomaaliya muddo sanad ah loogu tababari doonaa dalka Uganda 2,000 oo askari oo loo diyaarinayo in ay ka qeybqaataan soo celinta sharcigii iyo kala dambeyntii Soomaaliya.

“Isla marka qorshahan la meel-mariyo waxaan diyaarin doonnaa qorshaha dhabta ah ee lagu tababarayo ciidamad Dowladda Soomaaliya”sidaas waxaa tiri Cristina Gallach  oo ah Afhayeenad u hadashay Madaxa Siyaasadda Arrimaha Dibadda ee Midowga Yurub Javier Solana.

Ilaa 200 oo tababare oo Midowga Yurub ka socda  ayay sheegtay Cristina Gallach in ay tababar siin doonaan Ciidamada Dowladda Soomaaliya, kuwaasi oo ay sheegtay in loo diyaarinayo in ay wax ka qabtaan dhibaatada dhinaca nabadgelyo darrada ah ee ka jira Soomaaliya.

Salaad Iidow Xasan (Xiis), Hiiraan Online
[email protected]
Muqdisho, Soomaaliya