Madaxweynaha Dowladda Soomaaliya iyo Madaxweynaha Maamulka Puntland oo uu shir uga socdo Magaalada Nairobi

Jimco, November 13, 2009(HOL): Waxaa goor dhaweyd uu shir uga bilowday Xarunta Safaaradda Soomaalida ee Magaalada Nairobi Madaxweynaha Soomaaliya Shiikh Shariif Shiikh Axmed iyo Madaxweynaha Maamulka Puntland C/raxmaan Maxamed Faroole.

Labada madaxweyne oo uu shirkoodu yahay mid ay albaabada u xiran yihiin ayaan ilaa iyo haatan la ogeyn waxyaabaha ay labada mas’uul uga wada hadlayaan, inkastoo ay jiraan warar sheegaya in ay ka wada hadlayaan dhowridda midnimada Soomaaliya iyo iskaashi ay ka yeeshaan dhinacyada dhaqaalaha iyo ammaanka.

Kulanka labada madaxweyne ayaa wuxuu yahay midkii ugu horreeyay oo ay yeeshaan, iyadoo ay xusid mudan tahay in ay labada madaxweynaba yihiin kuwo madaxweynenimada ku cusub oo waqti aan dheereyn qabtay xilalka ay hayaan.

Si kastaba arrintu ha ahaatee, Kulankan ayaa wuxuu imaanayaa iyadoo horay kulamo u qaateen Ra’iisal Wasaaraha Soomaaliya Cumar C/rashiid Cali Sharma-arke iyo Madaxweyne C/raxmaan Faroole, waxaana la xusuusan yahay in ay labada mas’uul heshiis kala saxiixdeen, inkastoo aan heshiiskaas weli la geynin Baarlamaanka Soomaaliya.

Wixii ka soo baxa Shirka labada madaxweyne kala soco halkan haddii Alle idmo.

Salaad Iidow Xasan (Xiis), Hiiraan Online
[email protected]
Muqdisho, Soomaaliya