Talaado, January, 9, 2024 (HOL) - Dowladda Fedaraalka Soomaaliya ayaa si kulul u cambaareysay talaabooyin Somaliland ay kula kacday qaar ka mid ah dadkii ka horyimid heshiiskii badda ee madaxweynaha Somaliland Muuse Biixi uu dhawaan Adis Ababa kula galay Raysal wasaaraha dalka Itoobiya Abiy Ahmed.
Warsaxafadeed kasoo baxay Wasaaradda Warfaafinta Soomaaliya ayaa lagu sheegay in dowladda Soomaaliya ay si weyn uga xun tahay isku dayada ay ku af qabaneyso Somaliland Warbaahinta iyo dadka ku nool gobolada Waqooyi.
“Dowladda Federaalka Soomaaliya waxay aad uga xun tahay tallaabooyinka gurracan ee maamulka Somaliland isugu dayayo in uu ku af qabto warbaahinta iyo dadweynaha gobollada waqooyi ee dalka ee ka dhiidhinaya Is-afgaradka sharci daradda ah ee xadgudubka ku ah gobonimada iyo sharafta dadka Soomaaliyeed ee uu la soo galay dowladda Itoobiya,” ayaa lagu yiri Warsaxafadeedka.
Warka kasoo baxay Warfaafinta Soomaaliya ayaa sidoo kale lagu sheegay in caburinta Somaliland ay ku hayso Wariyaasha iyo dadka deegaanadaas ee ka horyimid heshiiskii Muuse Biixi iyo Abiy Ahmed inuu yahay xadgudub labaad.
“In la beegsado weriye iyo warbaahin si madax banaan oo dheelitiran u tabinaysa wararka iyo xaqiiqda deegaanada Somaliland ka taagan maanta ee ay ku kaceen laamaha amniga ee Somaliland waa nasiib darro muujinaysa halka uu taagan yahay heerka ku xadgudubka xaquuqda aadanaha iyo ku dhaqanka sharciga. Dareenka waddaniyadda iyo dal jaceylku ku jiro ee dadka gobollada waqooyi, xoog laguma maquunin karo, lagumana af qaban karo, waxaana ay xoojinaysa in kacdoonka shacbka uu laba kacleeyo" ayaa lagu yiri Warsaxafadeedka kasoo baxay Wasaaradda warfaafinta Soomaaliya.
Hay'adaha amaanka Somaliland ayaa looga digay iney qaadaan talaabooyin la xariira dhaqan galinta heshiiskii xadgudubka ahaa ee Somaliland la gashay Itoobiya oo la tilmaamay iney keeni karaan xaalado halis ah.
“Hay’adaha amniga ee maamulka Somaliland waxaan uga baaqaynaa in ay ka waantoobaan u hiilinta iyo garab siinta is afgaradka sharci daradda ah iyo damacaItoobiya ku doonayso in ay ku qaadato dhul iyo bad Soomaaliyeed taas oo qatar ku ah mustaqbalka iyo karaamada dadka gobollada waqooyi ku nool iyo guud ahaan umadnimada shacabka Soomaaliyeed” ayaa lagu yiri Warsaxafadeedka Wasaaradda Warfaafinta Soomaaliya.
Warka kasoo baxay Warfaafinta Soomaaliya ayaa lagu bogaadiyay guud ahaan Shacabka Soomaaliyeed ee sida ay ku dheehan tahay Soomaalininada iyo wadanininada uga dareen celiyay xadgudubka dowladda Itoobiya ay ku dooneyso 20 KM oo ka mid ah biyaha Soomaaliya, taas badalkeena ay aqoonsi ku siineyso Somaliland.