Axad, Maarso, 27, 2022 (HOL) - Raysal wasaaraha Xukuumadda Fedaraalka Soomaaliya Maxamed Xuseen Rooble ayaa Maanta kulan la qaatay madaxda ugu sareysa hay'addaha amniga dalka iyo kuwa howlgalka Midowga Afrika ee AMISOM.
Kulanka dhexmaray Raysal wasaare Rooble iyo madaxda sare ee hay'addaha amaanka ayaa looga hadlay xaaladihii ugu dambeeyay ee amniga dalka iyo warbixino la xariira weerarkii ka dhacay Muqdisho iyo qaraxyadii khasaaraha badan geystay ee ka dhacay magaalada Baledweyne.
Madaxda amniga hay'addaha dowladda Soomaaliya ayuu faray Raysal wasaare Rooble iney baaritaano dhab ah ku sameeyaan weeraradii ka kala dhacay Muqdisho iyo Baledweyne, islamarkaana ay xoojiyaan amaanka guud ee dalka gaar ahaan goobaha doorashooyinka ka dhacayaan, sida doorashada guddoonka Golaha Shacabka oo lagu wado iney dhawaan ka dhacdo Muqdisho.
Wasiiru dowlaha Wasaaradda Amniga Xukuumadda Soomaaliya Farxaan Cali Axmed oo kulanka kadib la hadlay Warbaahinta ayaa sheegay in Raysal wasaaraha uu magacaabay guddi isku dhaf ah oo isugu jira wasiiro iyo saraakiil amni oo dowladda iyo AMISOM ka wada tirsan, kuwaasoo looga fadhiyo iney si deg deg ah uga soo tala bixiyaan weeraradii dhawaan ka dhacay magaalooyinka Baledweyne iyo Muqdisho.
Wakiilka Midowga Afrika ee AMISOM oo dhankiisa ka hadlay kulanka ayaa sheegay iney ka xun yihiin weeraradii ka dhacay Muqdisho iyo Baledweyne, islanarkaana guddiga raysal wasaaraha uu magacaabay ay howl bilaabi doonaan maalinta berito ah.
Maalintii shalay ayey aheyd markii madaxweynaha mudo xileedkiisa dhamaaday ee Maxamed Cabdullaahi Farmaajo uu kulan la qaatay Taliyeyaasha Ciidamada Xoogga Dalka, Booliska, Asluubta iyo Nabad Sugidda, waxaana kulankaas ka maqnaa Wasiiradda amniga iyo Gaashaandhiga Xukuumadda Fedaraalka, kuwaas oo Maanta ka qeyb galay kulanka Raysal wasaare Rooble iyo madaxda hay'addaha amniga.