12/21/2014
Today from Hiiraan Online:  _
Wararka Maanta- Axad, Jun 30, 2013
Maamulka Sh. Axmed Madoobe oo si buuxda ula wareegay gacan ku haynta Magaalada Kismaayo ee Gobolka Jubbada Hoose


Axad, Juun 30, 2013 (HOL) — Ciidamada Maamulka Axmed Maxamed Islaam (Axmed Madoobe) ayaa la wareegay gacan ku haynta magaalada Kismaayo ee xarunta gobolka Jubbada Hoose, kaddib dagaallo saddexdii maalmood ee ugu dambeeyay ka socday gudaha magaaladaas.

Dhinacyadii kasoo horjeeday maamulka Axmed Madoobe ayaa la sheegay in ay isaga baxeen magaalada kaddib markii culeys ciidan la saaray, iyagoo ku sugan haatan duleedyada magaalada Kismaayo.

Wariyaha HOL ee Kismaayo, Xasan Nuur ayaa soo sheegaya in shacabku ay isugu soo baxeen wadooyinka waaweyn ee magaalada si ay u arkaan wixii ay geysteen dagaaladii maalmihii ugu dambeeyay ka socday Kismaayo.

Col. Barre Hiiraale, Cabdi Baalleey iyo Iftiin Xasan Baasto oo ahaa raggii isku bahaystay dagaalka Kismaayo ayaa la sheegayaa inay iyaguna ka baxeen gudaha magaalada Kismaayo oo ay ku sugan yihiin dhul-buuraley ah oo dhinaca galbeed kaga beegan magaalada.

“Xaaladda magaalada Kismaayo waa daggan tahay, waxaana si buuxda gacanta ugu haya ciidamada maamulka Sheekh Axmed Madoobe, dadkuna dibada ayay guryahooda uga soo baxeen markii ugu horreysay muddo saddex maalmood ah,” ayuu yiri Xasan Nuur.

Ma jirto mas’uul ka tirsan maamulka Axmed Madoobe ee Jubaland oo ka hadlay isbedelka ka dhacay magaalada, waxaana weli gudaha magaalada lagu arkayaa ciidamada maamulka oo wata gaadiidka dagaalka oo marba dhinac u socda.

“Hadda waxaa socda aasidda maydadkii ku dhintay dagaalladii socday labadii maalmood ee lasoo dhaafay, kuwaasoo banaanka iska yaalay tan iyo xilligaas, wax xabad ah oo magaalada laga maqlayana ma jirto” ayuu wariye Xasan Nuur ku daray hadalkiisa.

Dagaalladii ka dhacay maalmihii lasoo dhaafay magaalada Kismaayo ayaa waxaa ku dhintay in ka badan 30-qof oo isugu jiray shacab iyo dhinacyadii uu dagaalku u dhexeeyay, iyadoo ay ku dhaawacmeen tiro intaas ka badan oo qaarkood lagu daweynayo isbitaalka guud ee Kismaayo.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

6/30/2013 2:08 PM EST
Axad, Juun 30, 2013 (HOL) — Wasiir ku xigeenka wasaaradda wafaafinta xukuumadda Soomaaliya, C/shakuur Cali Mire oo maanta shir jaraa’id ku qabtay Muqdisho ayaa ciidamada Kenya ee qaybta ka ah howgalka AMISOM ku eedeeyay inay ka qaybgaleen dagaalkii Kismaayo ka dhacay.

6/30/2013 2:00 PM EST
Axad, Juun 30, 2013 (HOL) — Dowladda Somalia ayaa sheegtay in arrinta Sheekh Xasan Daahir Aweys ay u baahan tahay fursad si arritan xal looga gaaro, waxaana arrintaan sheegay afhayeenka madaxweynaha Soomaaliya, Inj. C/raxmaan Cumar Cismaan (Yariisow).

6/30/2013 1:16 PM EST
Axad, Juun 30, 2013 (HOL) — Madaxweynaha Soomaaliya, Xasan Sheekh Maxamuud ayaa maanta ka qaybgalay xirtaankii kalfadhigii labaad ee golaha baarlamaanka Soomaaaliya oo maanta lasoo xiray, waxaana sidoo kale goob-joog ka ahaa kulankaas guddoomiyeyaasha baarlamaannada Puntland iyo Galmudug.

6/30/2013 10:31 AM EST
Axad, Juun 30, 2013 (HOL) — Wasaaradda Qorsheynta Qaranka Somaliland, ayaa soo bandhigay daraasad ay afartii sannaba mar samayso oo lagu eego hab nololeedka bulshadda Somaliland sida arrimaha Hooyadda iyo dhalaanka, Caafimaadka, waxbarashadda, shaqada iyo isticmaalka biyaha nadiifadda ah.

6/30/2013 10:31 AM EST
Axad, Juun 30, 2013 (HOL) — Guddoomiyaha maamulka gobolka Hiiraan Cabdi Faarax Lanqayo oo shir jaraa'id ku qabtay maanta magaalada xafiiskiisa magaalada Baladweyne ayaa uga digay ganacsatada gobolka in ay soo galiiyaan magaalada lacago been abuur ah.

6/30/2013 10:31 AM EST
Axad, Juun 30, 2013 (HOL) — Hay’adda horumarinta haweenka Soomaaliyeed ee SWDC ayaa Muqdisho ka qaybisay deeq dhar ah oo ay soo dhiibeen jaaliyadda Soomaaliyeed ee ku nool Magaalada London ee xarunta dalka Britain , iyadoo deeqdan ay ka koobnayd dharka haweenka, raga iyo kuwa caruurta, waxaaana la socday kabo iyo bustayaal.

6/30/2013 3:49 AM EST
Axad, Juun 30, 2013 (HOL) — Wafdi uu hoggaaminayo wasiirka Owqaafta, arrimaha diinta iyo dhaqanka dalka Jabuuti ayaa Muqdisho u yimid saakay ka qaybgalka munaasabadda 01-da Luuliyo oo ku beegan 53-guuradii kasoo wareegtay markii gobollada Koonfureed ka xoroobeen gurmeysigii Talyaaniga iyo is-raacii labada gobol.

6/30/2013 2:52 AM EST
Axad, Juun 30, 2013 (HOL) — Dowladda Soomaaliya ayaa xabsiga dhigtay Sheekh Xasan Daahir Aweys iyo xubno taageerayaashiisa ah oo la socday, kuwaasoo xalay fiidkii laga soo dajiyay garoonka diyaaradaha ee Muqdisho.

6/30/2013 2:30 AM EST
Axad, Juun 30, 2013 (HOL) — Afhayeenka howgallada Al-shabaab, Sheekh C/casiis Abuu-Muscab ayaa war uu warbaahinta siiyay ku xaqiijiyay in laba ka mid ah saraakiishii sar-sare ee Al-shabaab lagu dilay degmada Baraawe ee gobolka Shabeellada Hoose, kaddib markii ay diideen inay is-dhiibaan.

6/30/2013 2:01 AM EST
Axad, Juun 30, 2013 (HOL) — Dagaal culus oo galay maalintii saddexaad ayaa saakay dib uga qarxay magaalada Kismaayo ee xarunta gobolka Jubbada Hoose, dagaalkan oo daba socda dagaalladii labadii maalmood ee lasoo dhaafay ka dhacayay degmadaas.