2014-08-21
Today from Hiiraan Online:  _
Wararka Maanta- Axad, Jun 30, 2013
Madaxweynaha Dowladda Somalia oo ka Qayb-galay Kulankii Xirtaanka Kal-fadhigii labaad ee Golaha Baarlamaanka Somalia


Axad, Juun 30, 2013 (HOL) — Madaxweynaha Soomaaliya, Xasan Sheekh Maxamuud ayaa maanta ka qaybgalay xirtaankii kalfadhigii labaad ee golaha baarlamaanka Soomaaaliya oo maanta lasoo xiray, waxaana sidoo kale goob-joog ka ahaa kulankaas guddoomiyeyaasha baarlamaannada Puntland iyo Galmudug.

Kulankan oo uu shir-gudooominayay guddoomiyaha baarlamaanka Somalia ayaa waxaa hadallo ka jeediyay guddoomiyaha baarlamaanka Puntland, C/rashiid Maxamed Xirsi, isgaoo sheegay in dastuurka Soomaaliya isbedel aanay ka warhayn lagu sameeyay.

“Dastuurka federaalka Soomaaliya ee dowladdan ay ku dhisan tahay 24-qodob oo ka mid ah ayaa laga bedelay, innagoo aan war u hayn, taasna waa mid aan ka xunnahay,” ayuu yiri guddoomiyaha baarlamaanka Puntland.

 Hadalka gudoomiyaha baarlamaanka Puntland ayaa waxaa ka jawaabay guddoomiyaha baarlamaanka Soomaaliya, Maxamed Cismaan Jawaari isagoo sheegay in dastuurka laga bedelay laba qodob oo keliya, ciddii kuwa kale ka bedeshayna la weydiin doono iyaga.

“Qodobbada dastuurka aan ka bedelnay waxay kala yihiin qodobka sheegaya in madaxweynaha ay dooranayaan laba aqal, waxaana ka dhignay in inta aqal sare la sameynayo uu dooran dooran doono baarlamaanka. Qodobka kalena waa midka ku saabsan caasimadda Soomaaliya inay tahay Muqdisho,” ayuu yiri guddoomiyaha baarlamaanka.

Intaas kaddib waxaa hadlay madaxweynaha Soomaaliya oo isaguna isla qodobka ku saabsanaa dastuurka ka hadlay, wuxuuna sheegay in dastuurka ay u yimaadeen, lana ogyahay inuu yahay mid qabyo ah, isagoo xusay inay lagama maarmaan tahay in isbedel lagu sameeyo si uu u noqdo mid dhameystiran.

Wasiirka arrimaha diinta, owqaafta iyo dhaqanka dalka Jabuuti, Aadan Xasan Aadan (Belelo) oo hadal ka kooban ka jeediyay kulanka intii aan la xirin ayaa sheegay in madaxweynaha Jabuuti uu salaam ku aaddan dabaal-dagga 01-da Luuliyo uu soo diray hay’adaha kala duwan ee dowladda, hadalkaas oo ay xildhibaannadu baarlamaanku ay si aad ah ugu sacab-tumeen.

Ugu dambeyn, guddoomiyaha baarlamaanka Soomaaliya ayaa soo xiray Kal-fadhigii labaad ee golaha baarlamaanka Soomaaliya, iyadoo kal-fadhiga saddexaad uu furmi doono billowga bisha September ee sannadkan. Laakiin guddoomiyaha baarlamaanka ayaa sheegay in labada July uu furmi doono kulan uu codsaday madaxweynaha Soomaaliya oo hal bil socon doona.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-06-30 2:08 PM EST
Axad, Juun 30, 2013 (HOL) — Wasiir ku xigeenka wasaaradda wafaafinta xukuumadda Soomaaliya, C/shakuur Cali Mire oo maanta shir jaraa’id ku qabtay Muqdisho ayaa ciidamada Kenya ee qaybta ka ah howgalka AMISOM ku eedeeyay inay ka qaybgaleen dagaalkii Kismaayo ka dhacay.

2013-06-30 2:00 PM EST
Axad, Juun 30, 2013 (HOL) — Dowladda Somalia ayaa sheegtay in arrinta Sheekh Xasan Daahir Aweys ay u baahan tahay fursad si arritan xal looga gaaro, waxaana arrintaan sheegay afhayeenka madaxweynaha Soomaaliya, Inj. C/raxmaan Cumar Cismaan (Yariisow).

2013-06-30 10:31 AM EST
Axad, Juun 30, 2013 (HOL) — Wasaaradda Qorsheynta Qaranka Somaliland, ayaa soo bandhigay daraasad ay afartii sannaba mar samayso oo lagu eego hab nololeedka bulshadda Somaliland sida arrimaha Hooyadda iyo dhalaanka, Caafimaadka, waxbarashadda, shaqada iyo isticmaalka biyaha nadiifadda ah.

2013-06-30 10:31 AM EST
Axad, Juun 30, 2013 (HOL) — Guddoomiyaha maamulka gobolka Hiiraan Cabdi Faarax Lanqayo oo shir jaraa'id ku qabtay maanta magaalada xafiiskiisa magaalada Baladweyne ayaa uga digay ganacsatada gobolka in ay soo galiiyaan magaalada lacago been abuur ah.

2013-06-30 10:31 AM EST
Axad, Juun 30, 2013 (HOL) — Hay’adda horumarinta haweenka Soomaaliyeed ee SWDC ayaa Muqdisho ka qaybisay deeq dhar ah oo ay soo dhiibeen jaaliyadda Soomaaliyeed ee ku nool Magaalada London ee xarunta dalka Britain , iyadoo deeqdan ay ka koobnayd dharka haweenka, raga iyo kuwa caruurta, waxaaana la socday kabo iyo bustayaal.

2013-06-30 4:32 AM EST
Axad, Juun 30, 2013 (HOL) — Ciidamada Maamulka Axmed Maxamed Islaam (Axmed Madoobe) ayaa la wareegay gacan ku haynta magaalada Kismaayo ee xarunta gobolka Jubbada Hoose, kaddib dagaallo saddexdii maalmood ee ugu dambeeyay ka socday gudaha magaaladaas.

2013-06-30 3:49 AM EST
Axad, Juun 30, 2013 (HOL) — Wafdi uu hoggaaminayo wasiirka Owqaafta, arrimaha diinta iyo dhaqanka dalka Jabuuti ayaa Muqdisho u yimid saakay ka qaybgalka munaasabadda 01-da Luuliyo oo ku beegan 53-guuradii kasoo wareegtay markii gobollada Koonfureed ka xoroobeen gurmeysigii Talyaaniga iyo is-raacii labada gobol.

2013-06-30 2:52 AM EST
Axad, Juun 30, 2013 (HOL) — Dowladda Soomaaliya ayaa xabsiga dhigtay Sheekh Xasan Daahir Aweys iyo xubno taageerayaashiisa ah oo la socday, kuwaasoo xalay fiidkii laga soo dajiyay garoonka diyaaradaha ee Muqdisho.

2013-06-30 2:30 AM EST
Axad, Juun 30, 2013 (HOL) — Afhayeenka howgallada Al-shabaab, Sheekh C/casiis Abuu-Muscab ayaa war uu warbaahinta siiyay ku xaqiijiyay in laba ka mid ah saraakiishii sar-sare ee Al-shabaab lagu dilay degmada Baraawe ee gobolka Shabeellada Hoose, kaddib markii ay diideen inay is-dhiibaan.

2013-06-30 2:01 AM EST
Axad, Juun 30, 2013 (HOL) — Dagaal culus oo galay maalintii saddexaad ayaa saakay dib uga qarxay magaalada Kismaayo ee xarunta gobolka Jubbada Hoose, dagaalkan oo daba socda dagaalladii labadii maalmood ee lasoo dhaafay ka dhacayay degmadaas.