12/20/2014
Today from Hiiraan Online:  _
Wararka Maanta- Axad, Jun 30, 2013
Dagaal culus oo Saakay dib uga billowday Magaalada Kismaayo ee Gobolka Jubbada Hoose iyo dadka oo barakacaya


Axad, Juun 30, 2013 (HOL) — Dagaal culus oo galay maalintii saddexaad ayaa saakay dib uga qarxay magaalada Kismaayo ee xarunta gobolka Jubbada Hoose, dagaalkan oo daba socda dagaalladii labadii maalmood ee lasoo dhaafay ka dhacayay degmadaas.

Rasaasta xooggeeda ayaa waxay ka dhacaysaa xaafadaha Guulwade iyo Shaqaalaha oo labada dhinac ay ku hardamayaan gacan ku hayntooda, iyadoo dadkii ku noolaa magaaladaas ay saakay billaabeen gabi ahaantood inay isaga baxaan halkaas.

Goobjoogayaal ku sugan Kismaayo ayaa HOL u sheegay in dagaalku uu aad uga culus yahay kuwii labadii maalmood ee lasoo dhaafay dhacayay, iyadoo dhinac walba uu doonayo inuu dib u hanto gacan ku haynta magaaladan oo ay u arkaan mid muhiim u ah.

“Dagaalku waa mid culus, wuxuuna xooggiisu ka socdaa xaafadaha Guul-wade iyo shaqaalaha, madaafiic badan ayaa magaalada ku daadanaysa, dadkuna way barakacayaan,” ayay tiri haweeney ku sugan Kismaayo oo la hadashay HOL.

Sidoo kale, haweeneydan waxay sheegtay in magaalada qaarkeed weli lagu arkayo maydadka dadkii shacabka ahaa iyo askartii ku dhintay dagaalkii shalay ka dhacay magaaladaas, dhaawacyadu ay buux-dhaafiyeen isbitaalka guud ee magaaladaas.

Ciidamada AMISOM ee ku sugan magaalada Kismaayo ayaan wax faragelin ah ku hayn dagaalka u dhexeeya hoggaamiyeyaasha Soomaaliyeed ee isku haya maamulka Jubaland ee bishii May looga dhawaaqay magaaladaas.

“Dadku waxay sameynayaan barakac aad u xooggan, madaama uu dagaalku noqday mid daba-dheeraaday qof walba wuxuu qorsheystay inuu isaga baxo magaalada si uu uga nabadgalo rasaasta ay dhinacyadu isku adeegsnayaan,” ayay tiri haweeney kale oo Kismaayo ka baracaysay.

Xukuumadda Soomaaliya, Midowga Afrika iyo Qaramada Midoobay ayaa ugu baaqday dhinacyada dagaalamaya inay xabbadda joojiyaan oo khilaafkooda ay ku dhameeyaan wadahadal iyo nabda, inkastoo dhinacyadan ay u muuqdaan kuwo aan dheg-jalaq u siinayn baaqyadan nabadeed ee soo baxaya.

Magaalada Kismaayo ayaa waxay gashay dagaallo ku saleysan sad-bursi dhinaca awoodda ah, iyadoo xubnaha dagaalku u dhexeeyo oo kala ah: Col. Barre Hiiraale, Sheekh Axmed Madoobe, Cabdi Balleey iyo Iftiin Xasan Baasto uu mid walba sheeganayo inuu yahya madaxweynaha maamulka Jubbaland.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

6/30/2013 2:08 PM EST
Axad, Juun 30, 2013 (HOL) — Wasiir ku xigeenka wasaaradda wafaafinta xukuumadda Soomaaliya, C/shakuur Cali Mire oo maanta shir jaraa’id ku qabtay Muqdisho ayaa ciidamada Kenya ee qaybta ka ah howgalka AMISOM ku eedeeyay inay ka qaybgaleen dagaalkii Kismaayo ka dhacay.

6/30/2013 2:00 PM EST
Axad, Juun 30, 2013 (HOL) — Dowladda Somalia ayaa sheegtay in arrinta Sheekh Xasan Daahir Aweys ay u baahan tahay fursad si arritan xal looga gaaro, waxaana arrintaan sheegay afhayeenka madaxweynaha Soomaaliya, Inj. C/raxmaan Cumar Cismaan (Yariisow).

6/30/2013 1:16 PM EST
Axad, Juun 30, 2013 (HOL) — Madaxweynaha Soomaaliya, Xasan Sheekh Maxamuud ayaa maanta ka qaybgalay xirtaankii kalfadhigii labaad ee golaha baarlamaanka Soomaaaliya oo maanta lasoo xiray, waxaana sidoo kale goob-joog ka ahaa kulankaas guddoomiyeyaasha baarlamaannada Puntland iyo Galmudug.

6/30/2013 10:31 AM EST
Axad, Juun 30, 2013 (HOL) — Wasaaradda Qorsheynta Qaranka Somaliland, ayaa soo bandhigay daraasad ay afartii sannaba mar samayso oo lagu eego hab nololeedka bulshadda Somaliland sida arrimaha Hooyadda iyo dhalaanka, Caafimaadka, waxbarashadda, shaqada iyo isticmaalka biyaha nadiifadda ah.

6/30/2013 10:31 AM EST
Axad, Juun 30, 2013 (HOL) — Guddoomiyaha maamulka gobolka Hiiraan Cabdi Faarax Lanqayo oo shir jaraa'id ku qabtay maanta magaalada xafiiskiisa magaalada Baladweyne ayaa uga digay ganacsatada gobolka in ay soo galiiyaan magaalada lacago been abuur ah.

6/30/2013 10:31 AM EST
Axad, Juun 30, 2013 (HOL) — Hay’adda horumarinta haweenka Soomaaliyeed ee SWDC ayaa Muqdisho ka qaybisay deeq dhar ah oo ay soo dhiibeen jaaliyadda Soomaaliyeed ee ku nool Magaalada London ee xarunta dalka Britain , iyadoo deeqdan ay ka koobnayd dharka haweenka, raga iyo kuwa caruurta, waxaaana la socday kabo iyo bustayaal.

6/30/2013 4:32 AM EST
Axad, Juun 30, 2013 (HOL) — Ciidamada Maamulka Axmed Maxamed Islaam (Axmed Madoobe) ayaa la wareegay gacan ku haynta magaalada Kismaayo ee xarunta gobolka Jubbada Hoose, kaddib dagaallo saddexdii maalmood ee ugu dambeeyay ka socday gudaha magaaladaas.

6/30/2013 3:49 AM EST
Axad, Juun 30, 2013 (HOL) — Wafdi uu hoggaaminayo wasiirka Owqaafta, arrimaha diinta iyo dhaqanka dalka Jabuuti ayaa Muqdisho u yimid saakay ka qaybgalka munaasabadda 01-da Luuliyo oo ku beegan 53-guuradii kasoo wareegtay markii gobollada Koonfureed ka xoroobeen gurmeysigii Talyaaniga iyo is-raacii labada gobol.

6/30/2013 2:52 AM EST
Axad, Juun 30, 2013 (HOL) — Dowladda Soomaaliya ayaa xabsiga dhigtay Sheekh Xasan Daahir Aweys iyo xubno taageerayaashiisa ah oo la socday, kuwaasoo xalay fiidkii laga soo dajiyay garoonka diyaaradaha ee Muqdisho.

6/30/2013 2:30 AM EST
Axad, Juun 30, 2013 (HOL) — Afhayeenka howgallada Al-shabaab, Sheekh C/casiis Abuu-Muscab ayaa war uu warbaahinta siiyay ku xaqiijiyay in laba ka mid ah saraakiishii sar-sare ee Al-shabaab lagu dilay degmada Baraawe ee gobolka Shabeellada Hoose, kaddib markii ay diideen inay is-dhiibaan.