3/28/2024
Today from Hiiraan Online:  _
Wararka Maanta- Axad, Jun 30, 2013
Hay’adda SWDC oo Dad Barakacayaal ah u Qaybisay deeq ay soo dhiibeen Soomaalida ku nool London Magaalada (SAWIRRO)


Axad, Juun 30, 2013 (HOL) — Hay’adda horumarinta haweenka Soomaaliyeed ee SWDC ayaa Muqdisho ka qaybisay deeq dhar ah oo ay soo dhiibeen jaaliyadda Soomaaliyeed ee ku nool Magaalada London ee xarunta dalka Britain , iyadoo deeqdan ay ka koobnayd dharka haweenka, raga iyo kuwa caruurta, waxaaana la socday kabo iyo bustayaal.

Deeqdan ayaa waxaa soo ururinteeda ka qaybqaatay gabdho Soomaaliyeed ee ku nool magaalada London, kuwaasoo kala ah: Caasho Diini Cawaale, Khadiijo Aadan, Caasho Maxamed Diini, Khadiijo Xamuud iyo Maama Xalwo waxayna dhammaantood la shaqeeyaan Cabdi Muuse Maaxay oo ah Sama-fale taakuleeya dadka dhibaateysan.

Maryan Dakhal Xuseen oo ah isku xiraha dhinaca Haweenka ee Hay’adda SWDC ayaa u mahadcelisay gabdhaha Soomaaliyeed ee deeqdan dharka ah soo dhiibay, iyadoo sheegtay inay si aad uga damqadeen walaalahood ku dhibaateysan gudaha Soomaaliyeed, waxay kaloo sheegtay in deeqdan loo qaybiyay 19-kaam oo ay ku jiraan dad barakacayaal ah kuwaasoo ka kala yimid 16-ka degmo ee gobolka Banaadir

“Deeqdan waxay ka koobneyd 28-bundadood oo ay ku jiraan noocyo kala duwan oo dhar ah, kabo iyo bustayaal,“ ayay tiri Maryan Dakhal oo sheegtay in dadka loo qaybiyay ay gaarayeen illaa 500 oo Qoys kuwaasoo qaar ka mi dah deeqda lagu siiyay xarunta hay’adda SWDC kuwa kalena loogu geeeyay kaamamkooda.

Dadkii ay gaartay deeqda ayaa u mahad-celiyey jaaliyadda Soomaaliyeed ee London, gaar ahaan gabdhihii Soomaaliyeed ee soo ururiyay deeqdaas kala duwan, waxayna ka dalbadeen inay sidan oo kale wixii ay awoodaan ugu soo dhiibaan, maadaam aay ku dhibaateysan yihiin gudaha dalka.

Ugu dambeyn, Maryan Dakhal ayaa jaaliyadaha kale ee Soomaaliyeed ugu baaqday inay ku daydaan gabdhaha Soomaaliyeed ee soo dhiibay deeqdan ee ku sugan magaalada London, sidoo kale waxay ugu baaqday hay’adaha samafalka , ganacstada iyo dowladda federaalka inay gargaar ballaaran u fidiyaan dadka Soomaaliyeed maadaama ay foodda nagu soo haysa bishii barakeysneyd  ee Ramadaan.






Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
6/30/2013 2:08 PM EST
Axad, Juun 30, 2013 (HOL) — Wasiir ku xigeenka wasaaradda wafaafinta xukuumadda Soomaaliya, C/shakuur Cali Mire oo maanta shir jaraa’id ku qabtay Muqdisho ayaa ciidamada Kenya ee qaybta ka ah howgalka AMISOM ku eedeeyay inay ka qaybgaleen dagaalkii Kismaayo ka dhacay.

6/30/2013 2:00 PM EST
Axad, Juun 30, 2013 (HOL) — Dowladda Somalia ayaa sheegtay in arrinta Sheekh Xasan Daahir Aweys ay u baahan tahay fursad si arritan xal looga gaaro, waxaana arrintaan sheegay afhayeenka madaxweynaha Soomaaliya, Inj. C/raxmaan Cumar Cismaan (Yariisow).

6/30/2013 1:16 PM EST
Axad, Juun 30, 2013 (HOL) — Madaxweynaha Soomaaliya, Xasan Sheekh Maxamuud ayaa maanta ka qaybgalay xirtaankii kalfadhigii labaad ee golaha baarlamaanka Soomaaaliya oo maanta lasoo xiray, waxaana sidoo kale goob-joog ka ahaa kulankaas guddoomiyeyaasha baarlamaannada Puntland iyo Galmudug.

6/30/2013 10:31 AM EST
Axad, Juun 30, 2013 (HOL) — Wasaaradda Qorsheynta Qaranka Somaliland, ayaa soo bandhigay daraasad ay afartii sannaba mar samayso oo lagu eego hab nololeedka bulshadda Somaliland sida arrimaha Hooyadda iyo dhalaanka, Caafimaadka, waxbarashadda, shaqada iyo isticmaalka biyaha nadiifadda ah.

6/30/2013 10:31 AM EST
Axad, Juun 30, 2013 (HOL) — Guddoomiyaha maamulka gobolka Hiiraan Cabdi Faarax Lanqayo oo shir jaraa'id ku qabtay maanta magaalada xafiiskiisa magaalada Baladweyne ayaa uga digay ganacsatada gobolka in ay soo galiiyaan magaalada lacago been abuur ah.

6/30/2013 4:32 AM EST
Axad, Juun 30, 2013 (HOL) — Ciidamada Maamulka Axmed Maxamed Islaam (Axmed Madoobe) ayaa la wareegay gacan ku haynta magaalada Kismaayo ee xarunta gobolka Jubbada Hoose, kaddib dagaallo saddexdii maalmood ee ugu dambeeyay ka socday gudaha magaaladaas.

6/30/2013 3:49 AM EST
Axad, Juun 30, 2013 (HOL) — Wafdi uu hoggaaminayo wasiirka Owqaafta, arrimaha diinta iyo dhaqanka dalka Jabuuti ayaa Muqdisho u yimid saakay ka qaybgalka munaasabadda 01-da Luuliyo oo ku beegan 53-guuradii kasoo wareegtay markii gobollada Koonfureed ka xoroobeen gurmeysigii Talyaaniga iyo is-raacii labada gobol.

6/30/2013 2:52 AM EST
Axad, Juun 30, 2013 (HOL) — Dowladda Soomaaliya ayaa xabsiga dhigtay Sheekh Xasan Daahir Aweys iyo xubno taageerayaashiisa ah oo la socday, kuwaasoo xalay fiidkii laga soo dajiyay garoonka diyaaradaha ee Muqdisho.

6/30/2013 2:30 AM EST
Axad, Juun 30, 2013 (HOL) — Afhayeenka howgallada Al-shabaab, Sheekh C/casiis Abuu-Muscab ayaa war uu warbaahinta siiyay ku xaqiijiyay in laba ka mid ah saraakiishii sar-sare ee Al-shabaab lagu dilay degmada Baraawe ee gobolka Shabeellada Hoose, kaddib markii ay diideen inay is-dhiibaan.

6/30/2013 2:01 AM EST
Axad, Juun 30, 2013 (HOL) — Dagaal culus oo galay maalintii saddexaad ayaa saakay dib uga qarxay magaalada Kismaayo ee xarunta gobolka Jubbada Hoose, dagaalkan oo daba socda dagaalladii labadii maalmood ee lasoo dhaafay ka dhacayay degmadaas.