2014-04-23
Today from Hiiraan Online:  _
Wararka Maanta- Axad, Jun 30, 2013
Dowladda Soomaaliya oo Xabsiga Dhigtay Sheekh Xasan Daahir iyo xubnihii la socday ee xalay soo gaaray Muqdisho


Axad, Juun 30, 2013 (HOL) — Dowladda Soomaaliya ayaa xabsiga dhigtay Sheekh Xasan Daahir Aweys iyo xubno taageerayaashiisa ah oo la socday, kuwaasoo xalay fiidkii laga soo dajiyay garoonka diyaaradaha ee Muqdisho.

Amarka lagu xiray Sheekh Xasan Daahir iyo xubnaha la socday ayaa waxaa bixiyay sida la sheegay wasiirka arrimaha gudaha iyo Amniga Qaranka, C/kariin Xuseen Guuleed, iyadoo lagu xiray xabsi ay leeyihiin ciidamada nabadsugidda Qaranka.

Sheekh Xasan Daahir ayaa waxaa degmada Cadaado oo uu ku sugnaa dhowrkii maalmood ee lasoo dhaafay kasoo waday xildhibaanno ka tirsan dowladda iyo waxgarad kale, iyadoo xubnahaas qaarkood ay sheegeen in laga fara-maroojiyay.

Yuusuf Indhacadde oo ka mid ahaa xubnihii Cadaado ugu tagay Sheekh Xasan Daahir iyo xubnaha la socday isla markaana keenay Muqdisho ayaa sheegay in ciidamada nabadsugiddu ay handadeen iyagiina la xiray, isagoo intaas ku daray in Sheekh C/qaadir Cali Cumar oo wafdiga hoggaaminayay ahna xildhibaan ka tirsan dowladda Soomaaliya dhaawac uu kasoo gaaray gacan.

“Xabsiga ayaan ku jirnaa waana nala handaday, qaarkeen jir-dil ayaa naloo geystay, dowladduna waxay nooga baxday ballankii ay nala gashay oo ahaa inaan keeno Muqdisho Sheekh Xasan Daahir uuna nabad ku joogayo,” ayuu yiri Yuusuf Indhacadde oo horay u soo noqday wasiir u dowlaha wasaaradda gaashaandhigga Soomaaliya.

Illaa xalay saqdii dhexe ayaa waxaa ka taagnaa garoonka diyaaradaha muran ku saabsan halka la geynayo Sheekh Xasan Daahir iyo xubnaha la socday, kaasoo u dhexeeyay saraakiisha hay’adda nabadsugidda Qaranka iyo xubnihii Cadaado ka keenay, inkastoo ugu dambeyn laga fara maroojiyay.

Ma jirto mas’uul ka tirsan dowladda Somalia oo ka hadlay arrintan, balse warar ayaa sheegaya in Sheekh Xasan Daahir loo wareejiyay xabsi kale oo ay ku sugan yihiin ciidammo ajnabi ah, inkastoo aan si dhab ah arrintaas loo xaqiijin.

Sheekh Xasan Daahir ayaa waxaa la socday xubno ka tirsanaa Al-shabaab oo kasoo raacay degmada Baraawe iyo xubno horay uga tirsanaa Xisbul Islaam oo kasoo raacay degmada Xarar-dheere ee gobolka Mudug.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-06-30 2:08 PM EST
Axad, Juun 30, 2013 (HOL) — Wasiir ku xigeenka wasaaradda wafaafinta xukuumadda Soomaaliya, C/shakuur Cali Mire oo maanta shir jaraa’id ku qabtay Muqdisho ayaa ciidamada Kenya ee qaybta ka ah howgalka AMISOM ku eedeeyay inay ka qaybgaleen dagaalkii Kismaayo ka dhacay.

2013-06-30 2:00 PM EST
Axad, Juun 30, 2013 (HOL) — Dowladda Somalia ayaa sheegtay in arrinta Sheekh Xasan Daahir Aweys ay u baahan tahay fursad si arritan xal looga gaaro, waxaana arrintaan sheegay afhayeenka madaxweynaha Soomaaliya, Inj. C/raxmaan Cumar Cismaan (Yariisow).

2013-06-30 1:16 PM EST
Axad, Juun 30, 2013 (HOL) — Madaxweynaha Soomaaliya, Xasan Sheekh Maxamuud ayaa maanta ka qaybgalay xirtaankii kalfadhigii labaad ee golaha baarlamaanka Soomaaaliya oo maanta lasoo xiray, waxaana sidoo kale goob-joog ka ahaa kulankaas guddoomiyeyaasha baarlamaannada Puntland iyo Galmudug.

2013-06-30 10:31 AM EST
Axad, Juun 30, 2013 (HOL) — Wasaaradda Qorsheynta Qaranka Somaliland, ayaa soo bandhigay daraasad ay afartii sannaba mar samayso oo lagu eego hab nololeedka bulshadda Somaliland sida arrimaha Hooyadda iyo dhalaanka, Caafimaadka, waxbarashadda, shaqada iyo isticmaalka biyaha nadiifadda ah.

2013-06-30 10:31 AM EST
Axad, Juun 30, 2013 (HOL) — Guddoomiyaha maamulka gobolka Hiiraan Cabdi Faarax Lanqayo oo shir jaraa'id ku qabtay maanta magaalada xafiiskiisa magaalada Baladweyne ayaa uga digay ganacsatada gobolka in ay soo galiiyaan magaalada lacago been abuur ah.

2013-06-30 10:31 AM EST
Axad, Juun 30, 2013 (HOL) — Hay’adda horumarinta haweenka Soomaaliyeed ee SWDC ayaa Muqdisho ka qaybisay deeq dhar ah oo ay soo dhiibeen jaaliyadda Soomaaliyeed ee ku nool Magaalada London ee xarunta dalka Britain , iyadoo deeqdan ay ka koobnayd dharka haweenka, raga iyo kuwa caruurta, waxaaana la socday kabo iyo bustayaal.

2013-06-30 4:32 AM EST
Axad, Juun 30, 2013 (HOL) — Ciidamada Maamulka Axmed Maxamed Islaam (Axmed Madoobe) ayaa la wareegay gacan ku haynta magaalada Kismaayo ee xarunta gobolka Jubbada Hoose, kaddib dagaallo saddexdii maalmood ee ugu dambeeyay ka socday gudaha magaaladaas.

2013-06-30 3:49 AM EST
Axad, Juun 30, 2013 (HOL) — Wafdi uu hoggaaminayo wasiirka Owqaafta, arrimaha diinta iyo dhaqanka dalka Jabuuti ayaa Muqdisho u yimid saakay ka qaybgalka munaasabadda 01-da Luuliyo oo ku beegan 53-guuradii kasoo wareegtay markii gobollada Koonfureed ka xoroobeen gurmeysigii Talyaaniga iyo is-raacii labada gobol.

2013-06-30 2:30 AM EST
Axad, Juun 30, 2013 (HOL) — Afhayeenka howgallada Al-shabaab, Sheekh C/casiis Abuu-Muscab ayaa war uu warbaahinta siiyay ku xaqiijiyay in laba ka mid ah saraakiishii sar-sare ee Al-shabaab lagu dilay degmada Baraawe ee gobolka Shabeellada Hoose, kaddib markii ay diideen inay is-dhiibaan.

2013-06-30 2:01 AM EST
Axad, Juun 30, 2013 (HOL) — Dagaal culus oo galay maalintii saddexaad ayaa saakay dib uga qarxay magaalada Kismaayo ee xarunta gobolka Jubbada Hoose, dagaalkan oo daba socda dagaalladii labadii maalmood ee lasoo dhaafay ka dhacayay degmadaas.