Ciidamada Booliska oo qabtay Xashiishad iyo Jaad loo waday maxaabiista ku jirta jeelka Hargeysa
Isniin, Augusto, 19, 2019 (HOL)-Taliye ku xigeenka ciidanka Booliska Somaliland Sarreeyo guuto Cabdiraxmaan Liibaan Fooxle ayaa sheegay in ay ciidamada gacanta ku dhigeen Xashiishad lagu soo qariyay Qaad, taasi oo la doonayay in la galiyo xabsiga dhexe ee magaalada Hargeysa.
''Ciidanka Boolisku waxay habeen iyo maalinba
ku jiraan heegan, kana hawl-galaya inay sugaan nabadgeliyada iyo amniga, sidoo
kalena la dagaalamaya mukhaadaraadka dhammaan gobolada dalka hawlgalkaasi ka
socdo, ciidamada boolisku waxaa ay ku guuleysteen xidhmooyinka xashiishad ah oo
lagu soo dhex qariyey qaadka oo loogu tallo galay in loo gudbiyo xabsiga dhexe
ee magaalada Hargeysa, loogana tuuro daarada, kadibna ciidamadda amaanka ee
roondada sameynayay ayaa gacanta ku soo dhigay”ayuu yidhi taliye ku xigeenka
booliska Fooxle.
Waxaanu intaas ku daray “Waxaana
lagu hayaa laba eedeysane, labadii eedeysanana gacanta ciidanka ayay ku jiraan
sharciga ayaana la hor keeni doonaa, sidoo kale laba saldhig oo ciidamada
booliska ayaa ku guuleystay inay qabtaan xashiishado daroogooyin Baco lagu soo
xidhay oo raashinka Maxaabiista la soo hoos galiyay, tani waa mid aan ku
amaanayo ciidamada Booliska, wey ku guuleysteen waana laba ka mida Saldhigyadda
ciidamada”
Xashiishadan ayaa loo waday
maxaabiista ku jirta jeelka, kuwaas oo xiitaa Jaadku mamnuuc ka yahay in
maxaabiista loo keenno.
Barkhad-ladiif M. Cumar, Hiiraan Online
[email protected]
Hargeysa, Somaliland.