Talaado, Maarso, 28, 2017 (HOL) - Shirka hogaamiyeyaasha Jaamacadda Carabta
ayaa Berri ka furmaya caasimada dalka Urdun ee Cammaan ,waxaana ka qeyb
galaya hogamiyeyaal badan oo ka socda wadamada Jamacadda carabta.
Madaxweynaha Jamhuriyadda Federaalka Soomaaliya, Maxamed Cabdullaahi
Farmaajo ayaa lagu wadaa in uu ka qeyb galo Shirkaasi.
Shirka qodobada looga hadlayo, waxaa ka mid ah Abaaraha ka jira Soomaaliya
,dhibaatooyinka ay la kulmayaan Falastiniyiinta, dagaalada ka socda Yemen.
Warbaahinta caalamka oo soo xiganaysa madaxda ka tirsan Jaamacadda Carabta
ayaa sheegay in wadamada Jaamacadda carabta ay si buuxda u taageeri doonaan
Dowladda Soomaaliya, islamarkaana ay lacago badan ugu yaboohi doonaan dadka ay
Abaaruhu Saameeyeen.
Wakaalada Wararka ee dalka Urdun ayaa sidoo kale ku warameysa in qodobada
looga hadlayo shirka ay Soomaaliya uga jirto kaalmaha hore.
Ugu danbeyntii, shir ay yeesheen wasiirada Arimaha dibada ee dalalka
Jaamacadda Carabta ayaa si weyn loogu faaqidaday arimo ay ka mid ahaayeen
abaarta ka jirta Soomaaliya.
C/raxmaan Diini, Hiiraan Online
[email protected]
