Culummaa'uddiinka Ahlusunna Waljacaama oo sheegay inay xoojin doonaan dagaalka ay kula jiraan Xoogagga Dowladda Soomaaliya kasoo horjeeda

Isniin, May 24, 2010 (HOL) − Afhayeenka Culummaa'udiinka Ahlusunna Waljamaaca Sheekh C/llaahi C/raxmaan (Abuu-Yuusuf) oo maanta shir Jaraa'id ku qabtay Muqdisho ayaa sheegay inay ballaarin doonaan dagaalka ay ka wadaan Muqdisho.

Sheekh C/llaahi wuxuu sheegay in dagaalladii ay ciidamadoodu ku galeen Muqdisho ay ahaayeen kuwo laga gaaray ujeedooyinkii laga lahaa, isagoo xusay inay wadaan qorshayaal ay ku weerarayaan deegaannada ay Ururka Xisbul Islaam iyo Xarrakatul Shabaab gacanta ku hayaan.

"Dagaalladii aan Muqdisho ka bilownay guulo ayaan ka gaarnay, hadafkeenuna wuxuu ahaa inaan u gargaarno Shacabka Muqdisho ku nool, waana xoojinaynaa dagaalka" ayuu yiri Afhayeenka Ahlusunna Walajamaaca.
Madaxa Warfaafinta ee Ahlusunna wuxuu sheegay in ciidamadoodu ay yihiin kuwo talis gaara ah laga maamulo oo aysan hoostagin dowladda, isagoo ugu baaqay Dowladda inay difaacato goobaha muhim ah sida Madaxtooyada.

Afhayeenku wuxuu ku eedeeyay Xarrakatul Shabaab inay caburin ku hayaan saxaafadda ka howlgasha Magaalada Muqdisho ayna dhawaan gudaha u galeen xarunta Idaacaddda Somaliweyn ayna ka qaateen qalab kala badan.

"Waxaa jira qorshayaal ku wajahan saxaafadda xorta ah oo ay Xarrakatul Shabaab waddo, waxaana ka mid ah in lagu soo rogo amarro ah inay u shaqeeyaan sida Idaacadda Kismaayo, ciddii diidana ay ka qaataan qalabka" ayuu yiri Sheekh C/llaahi C/raxmaan Abuu-Yuusuf.

Kooxda Ahlusunna oo ka mid ah Islaamiyiinta hubeysan ee ku dagaalamaya Muqdisho ayaa horay u sheegay inay dagaallo ka bilaabeen Muqdisho, kuwaasoo ay kaga horjeedaan Xisbul Islaam iyo Xarrakatul Shabaab.

Maxamed Xaaji Xuseen, Hiiraan Online
[email protected]
Muqdisho, Soomaaliya