3/19/2024
Today from Hiiraan Online:  _
Wararka Maanta- Sabti, July 28, 2012
Dilal qorsheysan oo Siyaabo kala duwan uga dhacay degmooyinka Ufuroow, Baydhabo iyo Duleedka Magaalada Muqdisho
Sabti, July 28, 2012 (HOL) — Kooxo hubeysan iyo ciidamada DKMG ah ayaa siyaabo kala duwan saddex qof ugu dilay maanta degmooyinka Ufuroow iyo Baydhabo oo ka tirsan gobolka Ba iyo duleedka magaalada Muqdisho, gaar ahaan deegaanka Lafoole.

Dilalkan ayaa waxay ahaayeen kuwo qorsheysan, iyadoo ciidammo ka tirsan kuwa dowladda KMG ah oo ku sugan deegaanka Lafoole ay toogasho ku dileen injineer magciisa lagu soo koobay Xalane, kaasoo la sheegay inay ku dhex toogteen gaari uu watay.

"Gaariga uu watay injineerka oo uu la socday qof kale ayay ciidamadu joojiyeen, muran kaddibna waxay toogteen injineerka, ninkii la socdayna cagihiisa ayuu kaga baxsaday," ayay yiraahdeen goobjoogayaal ku sugan barta uu dilku ka dhacay.

Lama oga sababta rasmiga ah ee ay ciidamada dowladdu u dileen injineerka oo ka soo baxay degmada Afgooye isagoo kusoo jeeday magaalada Muqdisho, waxaase warar hoose ay sheegayaan in ciidamadu ay weydiisteen lacag baad ah taasna la isku af-dhaafay.

Sidoo kale, kooxo bastoolado ku hubeysan ayaa ku dilay degmada Ufuroow ee gobolka Bay sarkaal ka tirsanaa Xarakada Al-shabaab oo magaciisa lagu sheegay Abuu-Salma ahaana madaxa dacwada ee deegaankaas oo ay ka taliso Al-shabaab.

Kooxaha dilka geystay ayaa baxsaday, iyadoo la sheegay in xoogagga Al-shabaab ay sameeyeen baaritaanno aan la ogeyn cidda ay kusoo qabteen, waxaana dilku uu ka dhacay masaajid uu sarkaalkan kusoo tukaday salaaddii subax.

Dhanka kale, askari ka tirsan ciidamada dowladda KMG ah ayaa isanaga lagu dilay saakay suuqa degmada Baydhabo, waxaana dilkiisa geystay koox bastoolado ku hubeysan oo markiibta goobta ka baxsaday.

Maamulka iyo saraakiisha DKMG ah ee ku sugan Baydhabo ayaan weli ka hadlin dilka askariga loo geystay, iyadoo falkan uu qayb ka noqonayo falal dhowr ah oo xilliyadii ugu dambeysay ka dhacayay gudaha degmada Baydhabo ee xarunta gobolka Bay.

Maxamed Xaaji Xuseen, Hiiraan Online
[email protected]
Muqdisho, Soomaaliya











Click here
7/28/2012 9:07 AM EST
Sabti, July 28, 2012 (HOL) — Hay'adda nabadsugidda DKMG ah ee Soomaaliya ayaa soo bandhigtay maanta sarkaal iyo askari kasoo goostay Xarakada Al-shabaab sida ay labadan ruux u sheegeen warbaahinta.

7/28/2012 8:55 AM EST
Sabti, July 28, 2012 (HOL) — Xaflad si heer sare ah loosoo agaasimay oo ay ka qayb-galeen mas'uuliyiin ka tirsan dowladda KMG ah ee Soomaaliya, ganacsato, dhakhaatiirta caafimaadka xoolaha, mas'uuliyiin ka tirsan maamullada gobollada Banaadir iyo Shabeellada hoose oo lagu furayay maxjar weyn oo maanta ka dhacday magaalada Muqdisho.

7/28/2012 8:30 AM EST
Sabti, July 28, 2012 (HOL) — Guddidda la dagaanka cudurka HIV/AIDS Somaliland, ayaa sheegay in sanadkan hoos u dhac ku yimid fiditaankii cudurkaasi marka loo eego heerkiii uu sanadkii hore marayey.

7/28/2012 8:20 AM EST
Sabti, July 28, 2012 (HOL) — Ergada ansixinaysa dastuurka qaybo-qoraalka ah ee Soomaaliya ayaa maanta oo Sabti ah loo akhriyay dastuurka oo ka kooban 79-qodob, iyadoo lagu wado in berri ay ka doodaan qodobbada ay u arkaan inay yihiin kuwo ay khaladaad ku jiraan.

7/28/2012 8:06 AM EST
Sabti, July 28, 2012 (HOL) — Munaasabad maanta ka dhacday Muqdisho ayaa lagu dhaafiyay 52 garsoore oo loogu talo-galay inay ka howlgalaan maxkamadda dalka, iyadoo xafladda dhaarinta ay ka qaybgaleen madaxweynaha Soomaaliya, Shariif Sheekh Axmed, wasiirro iyo guddoomiyaha maxkamadda sare ee dalka.

7/28/2012 7:35 AM EST
Sabti, July 28, 2012 (HOL) — Guddoomiyaha maxkamadda sare ee dowladda KMG Soomaaliya, Caydiid C/llaahi Ilko-Xanaf oo maanta ka hadlayay munaasabad lagu qabtay Muqdisho oo lagu dhaarinayay garsoorayaal ayaa sheegay in dastuurka qaybo-qoraalka aysan ku caddeyn xuquuqda garsoorka Soomaaliya.

7/28/2012 2:16 AM EST
Sabti, July 28, 2012 (HOL) — Madaxweynaha Puntland, Cabdiraxmaan Maxamed Faroole ayaa ka dlabaday beesha calaamka inay gacan ka geystaan sidii dhallinta Soomalaiyeed ee dalka ka tahriibaya dib loogu soo celin lahaa, isagoo madaxda DKMG ah ka dalbaday inay iyaguna doorkooda ka qaataan arrintan.

7/28/2012 2:15 AM EST
Sabti, July 28, 2012 (HOL) — Shirkii ansixinta dastuurka qabyada ah ee Soomaaliya ayaa maanta dib uga billaabanaya magaalada Muqdisho kaddib markii uu shalay ku yimid hakad, taasoo uu wasiirka dastuurku ku sheegay inay ahayd cillad farsamo oo dhinaca kambiyuutarrada ah.

7/28/2012 2:06 AM EST
Sabti, July 28, 2012 (HOL) — Ugu yaraan shan qof oo saddex ka mid ah ahaayeen ciidamada dowladda KMG ah ayaa ku dhintay qaraxyo shalay oo Jimco ahayd ka dhacay koontaroolka ku yaalla duleedka degmada Baydhabo ee xarunta gobolka Bay.