 |
"Dhaawaca wariyaha wuxuu ahaa mid hagaagsan, balse Sabtidii ayay xaaladdiisu ka dartay, ugu dambeynna xalay ayuu ku geeriyooday isbitaalka Madiina," ayuu yiri Maxamed Bashiir Xaashi oo ka mid ah wariyeyaasha idaacadda Shabelle oo qaar ka mid ah saxaafadda u warrramayay saakay oo Isniin ah.
Laba nin oo hubeysan ayaa toddobaadkii hore toogasho ku dhaawacay wariyaha iyagoo dhowr xabbadooda kaga dhuftay qaybaha sare ee jirkiisa, taasoo keentay in dhaawac ahaan loo dhigo isbitaalka Madiina oo uu xalay ku geeriyooday.
Maxamuud Tuuryare oo ah aabbaha dhalay wariyaha geeriyooday ayaa sheegay in wiilkiisa dhowr jeer oo loo hanjabay, kooxaha u hanjabayna ay u sheegeen inay dili doonaan haddii uu shaqada iska dhaafo iyo haddii kale.
"Wiilkeyga dhowr jeer ayaa loo hanjabay, isaguna wuxuu go'aansaday inuu dhinto isagoo howshiisa saxaafadeed ku jira, taasna way dhacday, waxaana wariyeyaasha kale ee ka howlgala Muqdisho kula talinayaa inaysan cabsi-gelin kuwa dhiigga dadka caadeystay," ayuu yiri Tuuryare.
Suxufigan oo 24-jir ahaa ayaa wuxuu 17 ka dhigayaa tirada suxufiyiinta lagu dilay Soomaaliya sannadkan oo keliya, iyadoo tani ay sii kordhanayso cabsida ay qabaan suxufiyiinta ka howgalaya Soomaaliya, gaar ahaan magaalada Muqdisho.
Ma jirto cid loo qabtay dilka wariyeyaashan la dilay, iyadoo maalmo ka hor lagu dilay magaalada Laascaanood ee gobolka Sool wariye u shaqeynayay Telefishinka Universal.
Maxamed Xaaji Xuseen, Hiiraan Online
[email protected]
Muqdisho, Soomaaliya