Maamulka Islaamiga ah ee ka taliya Gobalka Hiiraan oo howlgal ku soo qab qabtay Burcad jidgooyo u tiilay

Isniin, November 24, 2008(HOL):Ciidamada Maamulka Islaamiga ah ee ka taliya Gobalka Hiiraan ayaa howlgal ay ka sameeyeen wadada isku xirta Degmooyinka Buula-burte iyo Beledweyne waxaa ay ku soo qab qabteen kooxo burcad ah oo maalmihii ugu danbeeyay dhibaato ku hayay dadka ku safra wadada isku xirta Goballada dhexe.
 
Kooxaha Burcadda ah ee  la soo qab qabtay oo gaaraya ilaa 9 ruux ayaa loo soo gudbiyay Xabsigga dhexe ee Magaalada Beledweyne, waxaana sida ay sheegeen saraakiisha Maxkamaduhu kooxahan dhawaan la horkeeni doonaan sharciga si loo waafajiyo wax shareecadu ka qabto falka lagu soo qabtay.
 
Howl-galka oo ahaa kii ugu horeeyay oo baaxadaa leh isla markaana laga fuliyo wadada dhaxmarta Gobalka Hiiraan ayaa waxaa siweyn u soo dhaweeyay dadka ku dhaqan Gobalka iyo waliba gadiidka ku Safra, kuwaa oo sheegay in tallaabada ay qaadeen Ciidamada Maxkamaduhu muujineyso sida ay uga dhab tahay wax ka qabashada arrimaha Nabad-galyada.
 
Markii ay la wareegeen Gobollada Gal-gaduud, Hiiraan, iyo Shabeelada dhexe Maamulka  Maxkamadaha Islaamiga ayaa waxaa si weyn u yaraaday weerarradii kooxda Burcaddu ku qaadi jireen gaadiidka Safarka.
 
Dhinaca kale Maxkamadaha Islaamiga ee Magaalada Beledweyne ayaa xukun karbaash ah ku fuliyay Wiil dhalinyaro ah oo sida lagu eedeeyay kufsi  kula kacay gabar dhaliyaro ah, walow Wiilka dhaliyarada ah ee la karbaashay uu sheegay in uusan kufsan gabadha laakiin ay raali ku wada ahaayeen falka lagu aadeeyay, hase ahaatee gabadha ayaan wax Xukun ah lagu fulin maadaama sida ay sheegtay uu kufsaday wiilkaas.
 
C/raxmaan Diini, Hiiraan Online
[email protected]
Beledweyn, Somalia