Axad, November, 10, 2024 (HOL) - Madaxweynaha maamul goboleedka Galmudug Axmed Cabdi Kaariye Qoorqoor ayaa shaaca ka qaaday in maamulkiisa uu diyaar u yahay qabashada doorasho qof iyo cod ah.
Madaxweyne Qoorqoor oo ka hadlayay furitaanka kalfadhiga 11-aad ee Baarlamaanka Galmudug ayaa tilmaamay in deegaanada Galmudug laga hirgalin doonto go'aanadii kasoo baxay Shirkii Golaha Wadatashiga Qaranka oo ay ugu horeeyeen in la qabto doorasho qof iyo cod ah iyo dhameystirka Dastuurka.
“Golaha Wadatashiga Qaran waxay ku heshiiyeen in dalka ay ka qabsoonto doorasho qof iyo cod ah, Galmudug waxaay qaadaneysa kaalinteeda, waxaana diyaar u nahay in deegaanadeena laga qabto doorasho qof iyo cod ah,” ayuu yiri Madaxweyne Qoorqoor.
Wuxuu sidoo kale sheegay madaxweyne Qoorqoor in amni ahaan deegaanada maamulka Galmudug ay ka dhici karaan doorashooyin qof iyo cod ah oo ay ka wanaagsan yihiin inta badan deegaanada kale ee dalka.
"In doorasho qof iyo cod ah laga qabto Galmudug iyo guud ahaan dalka waa guul weyn oo u soo hoyatay dadka Soomaaliyeed, maadama ay muhiim tahay in dib loogu celiyo awooda bulshada Soomaaliyeed si ay u soo doortaan cida ay doonayaan" ayuu yiri madaxweynaha Galmudug Axmed Qoorqoor.
Hadalkan kasoo yeeray Madaxweynaha Galmudug ayaa ku soo aadaya xilli dhawaan golaha wadatashiga Qaranka, gaar ahaan madaxda maamulada Koofur Galbeed, Hirshabeelle, Galmudug iyo maamulka gobolka Banaadir ay ku heshiiyeen in doorasho qof iyo cod ah dalka ka dhacdo, hayeeshe waxaa heshiiskaas ka maqnaa oo aan qeyb ka aheyn madaxda maamulada Jubbaland iyo Puntland, kuwaas oo si cad u diiday go'aanada kasoo baxay Golaha Wadatashiga Qaranka.