3/28/2024
Today from Hiiraan Online:  _
Wararka Maanta- Sabti, Jun 8 , 2013
Dagaal culus oo ka Qarxay Bartamaha Magaalada Kismaayo

Sabti, Juun 08, 2013 (HOL) — Dagaal culus oo la isku adeegsanayo hubka noocyadiisa kala duwan ayaa ka qarxay goor-dhow bartamaha magaalada Kismaayo ee xarunta gobolka Jubbada Hoose, dagaalkan oo daba socda dagaalkii shalay.

Dagaalka ayaa wuxuu ka billowday Via-Afmadow oo ka tirsan xaafadda Calanley, waxaana dagaalkan uu qarxay kaddib markii ciidamada Axmed Madoobe ay weerar ku qaadeen ciidammo uu hoggaaminayo mid ka mid ah raggii madaxweynayaasha sheegtay oo lagu magacaabo, Iftiin Xasan Baasto.

Wariyaha HOL ee Kismaayo, Xasan Nuur ayaa soo sheegaya in dagaalka uu yahay mid ka culus kii shalay ka dhacay Kismaayo ayna dhinacyadu isku adeegsanayaan hub ay ka mid yihiin madaafiicda culus.

“Magaalada oo dhan waa faaruq waxaa ku hardamaya ciidamada iska soo horjeeda, dadku waxay ku jiraan guryahooda, xaaladduna waa mid aad u culus,” ayuu yiri wariyaha HOL ee Kismaayo Xasan Nuur.

Afhayeenka ururka Raaskambooni, C/naasir Seeraar ayaa xalay u sheegay BBC-da inay u qorsheysan tahay inay dagaalka soo af-jarayaan maanta oo Sabti ah, isagoo sheegay in ciidamada ay la dagaalamayaan ay yihiin kuwo ay hubeysay dowladda Soomaaliya.

Laakiin dowladda Soomaaliya ayaa ku baaqday in dagaalka la joojiyo wax walba oo khilaaf ahna lagu dhameeyo nabad, iyadoo madaxweynaha iyo ra’iisul wasaaraha Soomaaliya ay labadaba cambaareeyeen dagaalkaas.

Xaaladda magaalada Kismaayo ayaa ka duwan sidii shalay, waxaana ay xilligan u muuqataa inay cagaha la gashay colaad ku saleysan sad-bursi dhinaca awoodda ah oo ay isku hayaan rag sheegtay inay madaxweynayaal ka yihiin maamulka Jubaland.

Ma jiro mas’uul ka tirsan labada dhinac ee dagaalamaya oo ka hadlay dagaalka saakay dib uga billowday Kismaayo, iyadoo sidoo kalena aan la ogeyn khasaaraha ka dhashay dagaalka oo oo ah mid aad u xoog badan.

Wixii faahfaahin ah waxaad kula socon doontaan wararkeenna dambe haddii Alle idmo.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
6/8/2013 3:51 PM EST
Sabti, Juun 08, 2013 (HOL) — Afhayeenka kooxda Raaskambooni ee uu hogaaminayo Sheekh Axmed Maxamed Islaam (Sheekh Axmed Madoobe) ayaa sheegay in dagaalladii ka dhacayay Jimichii shalay iyo Sabtidii maanta ay ahaayeen shir-qoollo ay soo abaabushay dowladda Soomaaliya ayna ku guuleysteen inay fashiliyaan.

6/8/2013 3:10 PM EST
Sabti, Juun 08, 2013 (HOL) — Afhayeenka guud ee Al-shabaab, Sheekh Cali Maxamuud Raage (Sheekh Cali Dheere) oo la hadlayay idaacado taageera Al-shabaab ayaa sheegay maanta inay gacanta ku hayaan ciidammo ka tirsan kuwa Midowga Afrika ee AMISOM.

6/8/2013 2:53 PM EST
Sabti, Juun 08, 2013 (HOL) — Madaxweynaha Somaliland Mudane Axmed Maxamed Maxamuud (Siilaanyo), ayaa maanta xafiiskiisa ku qaabilay wefti ganacsato ah oo ka socda dalka Yeman.

6/8/2013 2:08 PM EST
Sabti Juun 8, 2013 (HOL) - Wariye Ibraahim Cumar Baafo ayaa wareysi la yeeshay Col. Iftiin Xasan Baasto, Madaxweynaha Jubalanda ee dhawaan lagu doortay magaalada Kismayo.

6/8/2013 10:53 AM EST
Sabti, Juun 08, 2013 (HOL) — Ugu yaraan lix qof oo ka kala tirsan AMISOM iyo Al-shabaab ayaa ku dhintay dagaal culus oo ciidamada Midowga Afrika iyo kuwa Al-shabaab maanta ku dhexmaray deegaan ku yaalla duleedka degmada Buurhakaba oo lagu magacaabo Buundo-Madow.

6/8/2013 10:36 AM EST
Sabti, Juun 08, 2013 (HOL) — Ciyaartoyga gobolka Togdheer oo maanta la ciyaari lahaa gobolka Sool, ayaa xabsiga loo taxaabay ka dib markii ay ku kaceen falal ka hor imanaya habsami u socodka tartanka kubadda cagta.

6/8/2013 10:29 AM EST
Sabti, Juun 08, 2013 (HOL) — Madaxweynaha Soomaaliya, Xasan Sheekh Maxamuud oo maanta dib ugu soo laabtay Muqdisho ayaa ugu baaqay dadka Soomaaliyeed inay la shaqeeyaan ergeyga cusub ee xoghayaha guud ee QM uu u soo magacaabay Soomaaliya iyo xafiiskiisa cusub ee UNSOM.

6/8/2013 10:05 AM EST
Sabti, June 08, 2013(HOL) :- Ciidamadii taabacsan maamulka uu hogaamiyo Sheekh Axmed Max’ed Islaam (Axmed Madoobe) ayaa maanta si buuxda ula wareegay gacan ku heynta magaalada Kismaayo kadib dagaal qaraar oo ay gudaha magaalada kula galeen ciidamo taabacsanaa Iftiin Xasan oo ka mid ah masuuliyinta sheeganeeysa madaxweeynenimada Jubbaland.

6/8/2013 8:10 AM EST
Sabti, Juun 08, 2013 (HOL) — Ciidamadda amniga Somaliland ayaa hawlgalo balaadhan oo ay dad ku soo qabqabteen ka fulinayey maalmihii ina dhaafay magaaladda Hargeysa iyo Burco, kuwaas oo baadhitaankoodu ka socdo xarumaha dambibaadhista ee magaalooyinkaasi.

6/8/2013 8:06 AM EST
Sabti, Juun 08, 2013 (HOL) — Ugu yaraan 10-qof oo dhinacyadii dagaalku u dhexeyay iyo shacab isugu jira ayaa ku dhintay dagaal saaka oo Sabti ah ka qarxay bartamaha magaalada Kismaayo, kaasoo u dhexeeya mas’uuliyiin isku haysta xilka madaxweynenimo ee maamulka Jubbaland oo bishii hore looga dhawaaqay Kismaayo.

6/8/2013 7:48 AM EST
Sabti, Juun 08, 2013 (HOL) — Qarax miino oo khasaare geystay ayaa maanta lagula eegtay degmada Dayniile ee gobolka Banaadir mas’uuliyiin ka tirsan maamulka gobolka Banaadir oo uu hoggaaminayay guddoomiye ku xigeenka maamulkaas, Cali Axmed Guure.

6/8/2013 3:15 AM EST
Sabti, Juun 08, 2013 (HOL) — Deeqdaan waxbarasho oo gaaraysa illaa labo kun oo doolarka Mareykanka ah, ayna iska soo ururiyeen dhallinyaro Soomaali ah hay’ad lagu magacaabo Shanta Foundation ayaa waxaa la guddoonsiiyey labo gabdhood oo ka mid ah arday wax ka barata mid ka mid ah iskuullada sare ee ay Soomaalidu maamusho ee ku yaala gobolka Minnesota.