3/29/2024
Today from Hiiraan Online:  _
Wararka Maanta- Axad, Jun 30, 2013
Wafdi ka socda dalka Jabuuti oo Muqdisho u yimid ka Qayb-galka xuska 01-da Luuliyo oo ku beegan Xorriyadda Somalia


Axad, Juun 30, 2013 (HOL) — Wafdi uu hoggaaminayo wasiirka Owqaafta, arrimaha diinta iyo dhaqanka dalka Jabuuti ayaa Muqdisho u yimid saakay ka qaybgalka munaasabadda 01-da Luuliyo oo ku beegan 53-guuradii kasoo wareegtay markii gobollada Koonfureed ka xoroobeen gurmeysigii Talyaaniga iyo is-raacii labada gobol.

Aadan Xasan Aadan (Balalo) oo aha wasiirka wafdiga hoggaaminayay oo kula hadlay wariyeyasha garoonka diyaaradaha ayaa sheegay in safarkooda uu yahay mid ay uga qaybgalayaan xuska maalinta xorriyadda Soomaaliya.

“Waxaan halkan u nimid sidii aan uga qaybgeli lahayn munaasabadda 53-aad ee kasoo wareegtay markii ay Soomaaliya xorowday, waana mid aan aad ugu faraxsannahay inaan ka qaybgalno,” ayuu yiri Aadan Balalo.

Garoonka diyaaradaha Muqdisho ayaa waxaa kusoo dhaweeyay wafdigan xubno uu ka mid ahaa wasiirka Owqaafta, arrimaha Diinta iyo Garsoorka Soomaaliya, C/llaahi Abyan Nuur iyo danjiraha Jabuuti ee Soomaaliya, Dayib Dubad Rooble.

Dalka Jabuuti oo ay ciidammo ka joogaan Soomaaliy ayaa wuxuu 27-kii June u dabaaladgay sannadguuradii 36-aad ee kasoo wareegtay markii ay xoriyada ka qaateen gumeytihii Faransiiska, iyadoo wafdi uu hoggaaminayo wasiirka wafaafinta Soomaaliya uu ka qaybgalay munaasabaddaas.

Xuska maalinta xorriyada Soomaaliya ee 01-da Luuliyo ayaa lagu wadaa inay caawa ka dhacdo Muqdisho, waxaana xafladda ugu weyn lagu qaban doonaa xarunta madaxtooyada Soomaaliya.

Maalintan waa maalin xusuus weyn ku leh Soomaalida oo dhan, iyadoo lagu qaban doono xaflado lagu maamuusayo dalalka caalamka qaarkood, gaar ahaan kuwa ay Soomaalidu deggen yihiin sida Mareykanka iyo Yurub.

Wafdigan ka socda dalka Jabuuti ayaa waxay Muqdisho ka ambabixi doona markii uu dhammaado dabbaal-dagga loo sameynayo 01-da Luuliyo sida uu warbaahinta u sheegay warsiirka Owqaaf, dhaqanka iyo diinta dalka Jabuuti, Aadan Balalo.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
6/30/2013 2:08 PM EST
Axad, Juun 30, 2013 (HOL) — Wasiir ku xigeenka wasaaradda wafaafinta xukuumadda Soomaaliya, C/shakuur Cali Mire oo maanta shir jaraa’id ku qabtay Muqdisho ayaa ciidamada Kenya ee qaybta ka ah howgalka AMISOM ku eedeeyay inay ka qaybgaleen dagaalkii Kismaayo ka dhacay.

6/30/2013 2:00 PM EST
Axad, Juun 30, 2013 (HOL) — Dowladda Somalia ayaa sheegtay in arrinta Sheekh Xasan Daahir Aweys ay u baahan tahay fursad si arritan xal looga gaaro, waxaana arrintaan sheegay afhayeenka madaxweynaha Soomaaliya, Inj. C/raxmaan Cumar Cismaan (Yariisow).

6/30/2013 1:16 PM EST
Axad, Juun 30, 2013 (HOL) — Madaxweynaha Soomaaliya, Xasan Sheekh Maxamuud ayaa maanta ka qaybgalay xirtaankii kalfadhigii labaad ee golaha baarlamaanka Soomaaaliya oo maanta lasoo xiray, waxaana sidoo kale goob-joog ka ahaa kulankaas guddoomiyeyaasha baarlamaannada Puntland iyo Galmudug.

6/30/2013 10:31 AM EST
Axad, Juun 30, 2013 (HOL) — Wasaaradda Qorsheynta Qaranka Somaliland, ayaa soo bandhigay daraasad ay afartii sannaba mar samayso oo lagu eego hab nololeedka bulshadda Somaliland sida arrimaha Hooyadda iyo dhalaanka, Caafimaadka, waxbarashadda, shaqada iyo isticmaalka biyaha nadiifadda ah.

6/30/2013 10:31 AM EST
Axad, Juun 30, 2013 (HOL) — Guddoomiyaha maamulka gobolka Hiiraan Cabdi Faarax Lanqayo oo shir jaraa'id ku qabtay maanta magaalada xafiiskiisa magaalada Baladweyne ayaa uga digay ganacsatada gobolka in ay soo galiiyaan magaalada lacago been abuur ah.

6/30/2013 10:31 AM EST
Axad, Juun 30, 2013 (HOL) — Hay’adda horumarinta haweenka Soomaaliyeed ee SWDC ayaa Muqdisho ka qaybisay deeq dhar ah oo ay soo dhiibeen jaaliyadda Soomaaliyeed ee ku nool Magaalada London ee xarunta dalka Britain , iyadoo deeqdan ay ka koobnayd dharka haweenka, raga iyo kuwa caruurta, waxaaana la socday kabo iyo bustayaal.

6/30/2013 4:32 AM EST
Axad, Juun 30, 2013 (HOL) — Ciidamada Maamulka Axmed Maxamed Islaam (Axmed Madoobe) ayaa la wareegay gacan ku haynta magaalada Kismaayo ee xarunta gobolka Jubbada Hoose, kaddib dagaallo saddexdii maalmood ee ugu dambeeyay ka socday gudaha magaaladaas.

6/30/2013 2:52 AM EST
Axad, Juun 30, 2013 (HOL) — Dowladda Soomaaliya ayaa xabsiga dhigtay Sheekh Xasan Daahir Aweys iyo xubno taageerayaashiisa ah oo la socday, kuwaasoo xalay fiidkii laga soo dajiyay garoonka diyaaradaha ee Muqdisho.

6/30/2013 2:30 AM EST
Axad, Juun 30, 2013 (HOL) — Afhayeenka howgallada Al-shabaab, Sheekh C/casiis Abuu-Muscab ayaa war uu warbaahinta siiyay ku xaqiijiyay in laba ka mid ah saraakiishii sar-sare ee Al-shabaab lagu dilay degmada Baraawe ee gobolka Shabeellada Hoose, kaddib markii ay diideen inay is-dhiibaan.

6/30/2013 2:01 AM EST
Axad, Juun 30, 2013 (HOL) — Dagaal culus oo galay maalintii saddexaad ayaa saakay dib uga qarxay magaalada Kismaayo ee xarunta gobolka Jubbada Hoose, dagaalkan oo daba socda dagaalladii labadii maalmood ee lasoo dhaafay ka dhacayay degmadaas.