Hiiraan Online

 

Talaado, November, 12, 2024 (HOL) - Iyadoo uu wali taaganyahay khilaafka u dhaxeeya maamulka Jubaland iyo Dowladda Federaalka ayaa Gudiga Doorashooyinka iyo Xuduudaha maamulkaasi waxaa la filayaa in ay maanta shaaca ka qaadaan Habraaca ay marayaan soo xulista Xildhibaanada cusub.

Xogo aan ka helnay xubno kamid ah Guddiga ayaa sheegaya in Guddigu is badal ku sameeyay qaabkii 2019 loo soo xulay Xildhibaanada Hadda jooga ee Baarlamaanka Jubaland.

Guddigan oo uu dhawaan magacaabay Madaxwaynaha maamulka Jubbaland Axmed Madoobe ayaa waxaa si adag uga soo horjeestay Dowladda Federaalka ayadoona sheegtay in aan la aqbalidoonin in dalka ay ka dhacdo wax aan ka ahayn Doorashooyinka qof iyo cod.

Axmed Madoobe ayaa hadda u muuqda in uu dhagaha ka xirtay amar kasta oo kaga yimaada Dowladda Federaalka isla markaasna uu qabsanaayo doorasho ay u madax banaantay Jubaland.

Soo xulista Xildhibaanada Jubaland kadib waxa laguda gali doonaa doorashada Madaxweynaha Jubaland, waxayna u muuqataa in markale dib loo dooran doono Axmed Madoobe.