Hiiraan Online

 

Arbaco, December, 4, 2024 (HOL) - Taliska hay'adda Nabad sugida iyo Sirdoonka Qaranka Soomaaliyeed ee NISA ayaa faahfaahin dheeraad ah ka bixiyay howlgal qorsheysnaa oo lagu dilay xubno ka tirsan kooxda Al-shabaab oo ku sugnaa gobolka Shabeellaha Hoose.

Warsaxafadeedka kasoo hay'adda NISA ayaa lagu sheegay in howlgalka uu si gaar ah uga dhacay deegaanka Baqdaad oo ku yaala duuleedka degmada Afgooye, islamarkaana lagu dilay 23 xubnood oo ka tirsanaa kooxda Al-shabaab.

NISA ayaa sidoo kale qoraalka ay soo saartay ku sheegtay in howlgalka intuu socday ciidamadeeda ay ku bur buriyeen fariisimahii ay ku lahaayeen kooxda Al-shabaab deegaanka Baqdaad ee gobolka Shabeellaha Hoose.

Waxaa sidoo kale Warsaxafadeedka NISA lagu faray dadka rayidka ah iney ka fogaadaan goobaha ay joogaan Al-shabaab oo ah goobo ay si gaar ah beegsi xoogan ugu hayaan qeybaha kala duwan ee ciidanmada qalabka Sida ee Soomaaliya.

Shalay ayay aheyd markii sidaan oo kale qoraal kasoo baxay hay'adda NISA lagu shaaciyay in howlgal ka dhacay deegaanka Yaaqle ee gobolka Shabeellaha Dhexe lagu dilay ilaa 27 xubnood oo ka tirsana kooxda Al-shabaab.

Hoos ka akhriso Warsaxafadeedka NISA oo dhaneystiran:-