12/21/2024
Today from Hiiraan Online:  _
Wararka Maanta- Jimco, Dec 13, 2024
Madaxweyne ku xigeenka Jubbaland oo kulan kula qaatay Addis Ababa Taliyaha Guud ee Ciidanka Itoobiya
 

Jimco, December, 13, 2024 (HOL) - Madaxweyne ku xigeenka koowaad ee maamulka Jubbaland Maxamuud Sayid Aadan ayaa magaalada Addis Ababa ee dalka Itoobiya kulan kula qaatay Taliyaha ciidanka dowladda Itoobiya Field Marshal Birhanu Jula.

Kulanka dhexmaray labadaan masuul ayaa la sheegay iney kaga wada hadleen qaabkii ay isaga kaashan lahayeen dowladda Itoobiya iyo maamulka Jubbaland dagaalka ka dhanka ah kooxda Al-shabaab iyo isu socodka bulshada Ku nool xuduudaha.

Madaxweyne ku xigeenka koowaad ee Jubbaland waxaa Kulankaan Ku wehlinaayay Wasiirka Wasaarada Tamarta iyo Kheyraadka Biyaha Jubaland Axmed Baraaki Zubeyr iyo Wasiirka Wasaaradda Isgaarsiinta iyo Teknolojiyada Jubaland Mascuud Cabdulaahi Axmed.

Kulankaan ayaa kusoo beegmaya, iyadoo khilaafka u dhaxeeya Jubbaland iyo dowladda Fedaraalka uu gaaray inuu dhexmaro labada dhinac dagaal khasaare geystay oo ka dhacay deegaanka Raaskambooni.

Ugu dambeyntii Jubbaland iyo Itoobiya ayaa horay dhowr jeer sidaan oo kale uga wada hadlay arrimo ay ka mid yihiin sidii Al-shabaab looga xureyn lahaa  deegaanada maamulka Jubbaland oo ka mid ah meelaha ay wali ku xoogan yihiin Ururka Al-shabaab.