Somaliland iyo Puntland oo maxaabiistii ay kala haysteen maanta isku wareejiyey
Isniin, June,03 2019 (HOL)- Xukuumadda Somaliland ayaa
maanta Madaarka Cigaal International Airport ee Hargeysa kusoo dhaweeyey saddex
askari oo kamida Ciidamada Militeriga
Somaliland oo Puntland ka qabsatay Somaliland, halka Somaliland 14 askari ku
wareejisay Puntland.
Saddexdan askari ee Puntland soo daysay waxa madaarka kaga
hortagay oo soo dhoweeyey Wasiiradda
Wasaaraddaha Gaashaandhiga, Arrimaha Gudaha, Cadaaladda, Taliyayaasha Ciidamada
Qaranka iyo Asluubta iyo Maareeyaha Hay’adda Duulimaadyada iyo Madaarada dalka.
Taliyaha Ciidanka Qaranka Nuux Ismaaciil Taani ayaa
sheegay in ilaahay loogu mahad naqo in
saddexdan askari oo ka tirsanaa Ciidanka Qaranka ay maanta dalkooda yimaadaan
iyagoo nabad-qaba, waxaana uu taliyuhu la wareegay masuuliyadda saddexdaa
askari.
Wasiirka Wasaaradda Gaashaandhiga Cabdiqani Maxamuud
Caateeye (Fariid) oo isaguna ka hadlay soo dhaweynta saddexda askari ayaa
sheegay inay guul tahay imaanshaha saddexda askari ee ka tirsanaa Ciidanka
Qaranka Somaliland, waxaana uu Madaxweynaha ku bogaadiyey doorkiisa nabadeed
iyo kaalinta uu ka qaatay soo daynta saddexda askari iyo sii daynta 14kii
maxbuus ee Puntland laga hayey.
Dhanka Kale Madaxweyne ku xigeenka Somaliland Mudane,
Cabdiraxmaan Cabdilaahi Ismaaciil (Saylici) oo ay wehelinayeen Wasiirrada
wasaaradaha arrimaha gudaha, gashaandhiga iyo cadaaladda, Taliyayaasha
Ciidamada kala duwan ayaa Madaarka Cigaal Intertional Airport ka anba bixiyey
Maxaabiis tiradoodu dhammayd 14 oo lagu qabtay dagaalkii Tuka-raq ku dhex maray
Somaliland iyo Puntland, kuwaas oo lagu sii daayey cafis madaxweynaha
Somaliland, Mudane Muuse Biixi Cabdi u fidiyey 18-kii May 2019-ka.
Wasiirka Wasaradda Arrimaha Gudaha Maxamed Kaahin Axmed oo
halkaasi ka hadlay ayaa sheegay in Dawladda Somaliland anba bixinayso
14-maxaabiis ah, kuwaas oo tegidoonaan deegaankoodii Garooowe, waxaana uu xusay
in sii daynta maxaabiistani ay ka danbaysay ka dib markii uu Madaxweynaha
Somaliland Mudane, Muuse Biixi Cabdi uu cafis u fidiyey maxaabiistaasi,
Wasiirku waxa uu kula dardaarmay Maxaabiistan oo u badnaa dhalinyaro inay
noqdaan safiirada nabadda ee Somaliland iyo Maamul kooda Puntland.
Maxabiistan waxa la wareegtay hay’adda ICRC oo iyadu
diyaarad gaara kaga qaaday garoonka Cigaal International Airport kuna geysay
magaalada Garoowe, halkaasina ay ka soo qaaday Saddex askari oo ay gacanta ku
hayeen Puntland soona daayeen ka dib markii madaxweynuhu u cafiyey maxaabiistii
dhinacooda laga hayey
Barkhad-ladiif M. Cumar, Hiiraan Online
[email protected]
Hargeysa, Somaliland.
