Wasiirro ka tirsan dowladda Soomaaliya iyo madaxweyne Biixi oo isku arkay dalka Saudi Arabia
Talaado, Augusto, 13, 2019 (HOL) – Magaalada Mina
ee dalka Boqortooyada Saudi Arabia kulan is arag ah oo aan horey loo sii
qorsheyn ku yeeshay Wasiirro ka tirsan xukuumadda Soomaaliya iyo madaxweynaha
Somaliland Muuse Biixi Cabdi, iyaga oo halkaa u wada joogay gudashada Acmaasha
Xajka.
Dhinaca madaxweynaha Somaliland waxaa kulanka ku
wehlinayay Wasiirkiisa Arrimaha Gudaha Maxamed Kaahin iyo Xubno kale, halka
dhinaca kale Wasiirradda xukuumadda Soomaaliya ee kulanka ka soo muuqday ay ka
mid ahaayeen Wasiirka Arrimaha Dibadda Soomaaliya Axmed Ciise Cawad, Wasiirka
Maaliyadda C/raxmaan Ducaale Beyle, Wasiirka Kalluumeysiga C/llaahi Bidhaan,
Wasiiro dowlaha Xafiiska Ra’iisul Wasaaraha C/llaahi Xaamud.
Baraha bulshada ayaa la soo dhigay sawir ay wada jir u galleen labada dhinac
Wasiiru-dowlaha xafiiska ra’iisal wasaaraha
Cabdullahi Xaamud ayaa sheegay in ay faraxad weyn u aheyd dhankooda in ay
arkaan madaxweynaha Somaliland oo ku tilmaamay in uu yahay qof waayo arag ah oo
garanaya ayuu yiri qiimaha aynu isku leenahay kaddib qoraal kooban oo uu soo
dhigay bartihiisa Facebook –ga
Kulankan Madaxweynaha Somaliland Muuse Biixi
Cabdi iyo Wasiirrada ka tirsan
Xukuumadda Soomaaliya ayaa noqonaya kii
ugu horeeyay oo ay isku arkaan labada dhinac.
C/raxmaan Diini, Hiiraan Online
[email protected]