3/28/2024
Today from Hiiraan Online:  _
Wararka Maanta- Sabti, Jun 2 , 2012
Madaxweynihii hore ee dalka Masar Xusni Mubaarak iyo Wasiirkiisii Arrimaha Gudaha oo lagu xukumay Xabsi daa'in ah


Sabti, June 02, 2012 (HOL) — Madaxweynihii hore ee dalka Masar, Xusni Mubaarak iyo wasiirkii arrimaha gudaha Xabiib Cadli ayaa maanta lagu xukumay xabsi daa'in kaddib dacwado socday tan iyo markii xukunka laga tuuray Mubaarak.

Mr. Mubaarak oo xukumayay dalka Masar muddo 30-sano ah ayaa lagu eedeeyay inuu mas'uul ka ahaa dilka kumannaan dibad-baxayaal ah oo dowladda kasoo horjeeday sannadkii hore, sidoo kalena uu ku-takri-fal dhinaca awoodda ah intii uu xukunka dalkaas hayay.

Xabiib Cadli ayaa isna lagu eedeeyay inuu gacan ku siiyay madaxweynihii hore dhibaatooyinkii uu ka geystay dalka Masar, waxaana maxkamaddu mas'uuliyiintan ku heshay dambiyada lagu eedeeyay.

Dacwadda Maxkamaddu u akhrisay dadweynaha Masar oo xukunka sugayay laguma sheegin in madaxweynaha dalka Masar uu bixiyay amarka lagu dilay 840-qof oo ka mid ahaa dibadbaxayaashii dalbanayay inuu xukunka ka dego, balse waxaa lagu sheegay dacwadda inuusan isku taxluujin inuu jooji dhiiggaas qubanaya.

Mubaarak ayaa la sheegay inuu xanuunsan yahay, uuna ku jiro isbitaal ku yaalla magaalada Qaahira. Ma cadda in loo wareejin doono xabsi iyo inuu isbitaalka ku jiri doono.

Dadweynaha dalka Masar ayaa xukunka kaddib codsaday in maxkamaddu ay sidoo kale xukunno ku riddo dadkii la shaqeyn jiray Mubaaarak oo uu ku jir murashaxa madaxweynenimo ee dalka Masar, Axmed Shafiiq.

"Mubaarak iyo Cadli waa inaan loo ogolaan inay dacwad kale furi karaan," ayuu yiri Maxamed Ibraahim oo sheegay in walaalkiis lagu dilay kacdoonkii laug dalbanayay inuu Mubaarak xilka ka dago bishii Jannaayo sannadkii 2011. "Haddii labadan qof ay ka baxsadeen xukun dil ah, waa inaan loo ogolaan abiil."

Wiilasha uu dhalay madaxweynihii hore ee Masar oo lagu kala magacaabo Jamaal iyo Calaa ayaa iyagana xukunkan oo kale mudan doona iyadoo loo hayso ku takri-fal dhinaca dhaqaalaha ah.

Mubaarak oo xukunka dalka Masar qabtay sannadkii 1981-kii kaddib markii la dilay madaxweynihii ka horreeyay Anwar Sadaat ayaa waxaa qolka maxkamaddu ka dhacaysay looga qaaday diyaaradaha qummaatiga u kaca ee Helicpter-ka loo yaqaan.

Xukunkan ayaa wuxuu imaanayaa iyadoo dalka Masar ay ka socoto doorasho lagu soo dooranayo madaxweynaha cusub ee dalkaas xukumaya kaddib markii xukunka laga tuuray madaxweynihii hore Xusni Mubaarak muddo hal sano laga joogo.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
6/2/2012 9:09 AM EST
Sabti, June 02, 2012 (HOL) — Madaxda dalalka ay ka socdaan ciidamada AMISOM ee ku sugan Soomaaliya ayaa ka sheegay shirkii Istanbuul II ee kusoo xirmay dalka Turkiga inay gacan ka siinayaan DKMG ah ee Soomaaliya sidii ay ammaan uga dhigi lahayd dalka oo dhan.

6/2/2012 8:37 AM EST
Sabti, June 02, 2012 (HOL) — Shirkii Isbtanbuul laba ee looga hadlayay sidii ay uga gudbi lahayd Soomaaliya xilliga KMG ah ayaa waxaa kasoo baxay qodobbo muhiim ah oo tilmaamaya howlaha la doonayo in calaamku ka qabto Soomaaliya.

6/2/2012 7:32 AM EST
Sabti, June 02, 2012 (HOL) — Ciidamada Booliiska iyo kuwa nabad-sugidda DKMG ah ee Soomaaliya ayaa lagu wareejiyay ammaanka deegaannada loo barkaacay ee duleedka Muqdisho, halkaasoo ciidamada dowladda iyo kuwa AMISOM ay toddobaad ka hor ka qabsadeen xoogaggii Al-shabaab ee ka talin jiray.

6/2/2012 7:04 AM EST
Sabti, June 02, 2012 (HOL) — Abaanduulaha ciidamada xoogga dalka, Jen. C/kariin Yuusuf Aadan (Dhego-badan) iyo taliyaha ciidamada nabadsugidda DKMG ah. Jen. Khaliif Axmed Ereg ayaa maanta lagu weeraray jidka Muqdisho iyo Afgooye u dhexeeya, waxaana mas'uuliyadda weerarradaas sheegatay Xarakada Al-shabaab.

6/2/2012 4:52 AM EST
Sabti, June 02, 2012 (HOL) — Ra'iisul wasaaraha dalka Turkiga, Recep Tayyip Erdogan oo ka hadlayay shirkii lagu soo gabgabeeyay Istanbuul ee looga hadlay sidii dib loogu soo celin lahaa deggenaashii Soomaaliya ayaa beesha caalamka ku war-geliyay inaysan ogaan karin xaaladda ka jirta Soomaaliya iyagoo aan tegin.

6/2/2012 4:34 AM EST
Sabti, June 02, 2012 (HOL) — Hal qof ayaa ku dhaawacmay kaddib markii xalay ay dadweyne careysan rabshado ka sameeyeen magaalada Garoowe ee xarunta Puntland, iyadoo dadkan ay muddo kooban xireen waddada weyn ee dhexmara degmadaas.

6/2/2012 4:24 AM EST
Sabti, June 02, 2012 (HOL) — Xoghayaha guud ee Qaramada Midoobay Ban Ki-Moon ayaa uga digay wufuuddii ka qaybgashay shirkii looga hadlay mustaqablka Soomaaliya ee labada maalmood ka socday magaalada Istanbuul ee dalka Turkiga in mar kale ay awoodda Soomaaliya la wareegaan dagaal-oogayaashii Soomaaliya.