Dablaydii dilka ka gaysatay Garoowe oo la qabtay iyo arday Soomaali ah oo kasoo cararay Yemen oo soo gaaray Boosaaso

Sabti, Abriil 09, 2011 (HOL) – Wasiirka amniga Puntland Yuusuf Axmed Khayr ayaa sheegay in gacanta lagu soo dhigay qaar ka mid ah dablayadii fulisay dilka masuul sare oo ka tirsanaa ha'yadda cilmi-baarista Puntland ee PDRC.

"Dablaydan waxaa laga soo qabtay meel 40-km u jirta Garowe ka dib howlgal millatari oo ciidanku ay fuliyeen"ayuu yiri wasiirka oo la hadlay qaar ka mid ah warbaahinta.

Waxaa kaloo wasiirka uu sheegay in ragga gacanta lagu soo dhigay ay gaarayaan sedex ruux oo mid ka mid ah lagu toogtay halkii ay ciidanku ugu tageen,iyadoo labada kale mid ka mid ah ciidanku ay ku dhaawaceen is-rasaasayntii dhex-martay labada dhinac.

Wasiirka ayaa intaaa ku daray in ay jiraan dad ku lug lahaa shirqoolkii ka dhacay Garowe oo lagu raad-joogo ,isagoo xusay in ay jiraan dad laga shakisanyahay oo ku sugan caasimadda Puntland.  "Laamaha dowladda wali wax ay daba socdaan kiisas horay uga dhacay gobolka, waana la ciqaabi doonaa dadka lagu raad-joogo," ayuu hadalkiisa ku daray wasiirka.

Yuusuf Axmed Khayr ayaa ka codsaday qaybaha bulshada in la taageero howlgallada noocaan oo kale ah si looga hortago kiisas kale oo ka dhaca gudaha Punltand.

"Howlgalkan sida aan xogta ku  hayno dadka dilka  fuliyay kama badna sedex ilaa afar ruux ,walina howlgalkii ma uusan dhamaan "ayuu ku jawaabay mar wax laga waydiiyay tirada dablayda dilka horay u gaysatay.

Dhinaca kale arday gaaraysa 53 ruux oo ka soo barakacay rabshadaha ka jira wadankaasi Yemen ayaa soo gaaray magaalada Bosaaso ee xarunta gobolka Bari.

Munaasabad lagu soo dhawaynayay ardaydan ayaa waxaa lagu qabtay Hotelka Muno ,waxaana ka soo qayb galay masuuliyiin dowladda ka tirsan oo uu ka mid yahay gudoomiyaha gobolka Sheekh C/xaafid Cali Yuusuf.

Faisel Maxamed Hassan,Hiiraan Online
[email protected]
Boosaaso, Soomaaliya