2014-08-30
Today from Hiiraan Online:  _
Wararka Maanta- Sabti, Jan 12, 2013
Faahfaahin ku saabsan iska-horimaad ciidammo Faransiis ah iyo Xoogagga Al-shabaab ku dhexmaray Deegaanka Buulo-Mareer



Sabti, Jannaayo 12, 2013 (HOL) — Ugu yaraan 20-qof oo isugu jira dhinacyadii dagaalamay iyo dad shacab ah ayaa ku dhintay dagaal xalay gellinkii dambe ku dhexmaray deegaanka Buulo-mareer ee gobolka Shabeellada Hoose ciidamada kumaandooska Faransiiska iyo xoogagga Al-shabaab.

Wasaaradda gaashaandhigga Faransiiska ayaa sheegtay in laba ka mid ah ciidamadooda komaandooska iyo la haystihii ay doonayeen inay soo furtaan ay kaga dhinteen weerarkaas, sidoo kalena ay ku dileen 17 dagaalyahan oo ka tirsan Al-shabaab.

Lix qof oo shacab ah ayaa sidoo kale ku dhintay dagaalkaas, kuwaas oo la sheegay inay ku jireen haweeney uur leh, cunug yar iyo nin oday ah, iyadoo la sheegay inay dadkaas toogteen ciidamadii dhulka ka dagaalamayay ee Faransiiska ahaa.

Dowladda Faransiiska ayaa sheegtay in Dennis Allex ay dileen xubno ka tirsan Al-shabaab intii uu dagaalku socday, balse Al-shabaab ayaa sheegtay inay weli gacanta ku hayaan Allex oo nool ayna saxaafadda u soo bandhigi dooonaan marka ay nabaddu u saamaxdo.

Al-shabaab kama aysan hadlin khasaaraha dhankooda kasoo gaaray dagaalka, iyadoo xaaladda degmada ay caadi kusoo laabatay maanta baqadii dina loo furay ganacsiga.

"Xaaladdu hadda waa deggen tahay, waxaase magaalada ka buuxa ciidammo Al-shabaab ah oo wata gaadiid dagaal, dadkuna waxay inta badan isweydiinayaan wixii dhacay," ayuu yiri Cumar Cali oo ka mid ah dadka ku nool deegaanka oo HOL la hadlay.

Goobjoogayaal kale ayaa sheegay inay arkeen maydka askari ka mid ah askartii Faransiiska ee lagu dilay weerarkii xalay, ayna Al-shabaab u sheegeen dadka deegaankaas inay soo bandhigi doonaan askartii ay ku dileen weerarkaas.

Saldghiggii Al-shabaab ee weerarka lagu qaaday ayaa gabi ahaan la burburiyay, waxaana weerarkan uu uu ahaa kii ugu horreeyay oo ay Faransiisku ku qaado saldhig ay Al-shabaab ku leeyihiin Soomaaliya.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-01-12 7:21 AM EST
Sabti, Jannaayo, 12, 2013 (HOL) – Tartan kubadda cagta ah oo ay ka qeyb-qaadanayeen ilaa afar naadi oo ka kala socday xaafadaha ay ka kooban tahay magaalada Baladweyne ayaa galinkii danbe ee maalintii shalay lagu soo gabagabeeyay garoonka kubadda cagta Lama-galaay.

2013-01-12 7:14 AM EST
Sabti, Jannaayo 12, 2013 (HOL) — Raashinkii quutal daruuriga ahaa, ayaa qaali garoobay ka dib markii sarifkii lacagta uu kor u kacay, taas oo maalmihii u dambeeyey ku abuurtay dadweynuhu inay iibsan kari waayaan.

2013-01-12 7:08 AM EST
Sabti, Jannaayo 12, 2013 (HOL) — Magaalada Muqdisho ayaa waxaa maanta ka dhacay laba qarax oo mid ka mid ha lagu weeraray gaari uu watay xildhibaan ka tirsan baarlamaanka Soomaaliya, iyadoo ay ku dhaawacmeen qaraxaas laba ka mid ah ilaaladii xildhibaanka.

2013-01-12 3:01 AM EST
Sabti, Jannaayo 12, 2013 (HOL) — Ciidamada ammaanka Kenya ayaa xalay ku toogtay xerada Dhagaxleey oo ka mid ah xeryaha Dhadhaab ku yaalla nin la sheegay inuu ahaa burcad dadka xeradaas ku jira dhac ugu geysanayay qori la been abuuray.

2013-01-12 2:29 AM EST
Sabti, Jannaayo 12, 2013 (HOL) — In ka badan 780 arday ayaa u fadhiistay imtixaanka kulliyadaha kala duwan ee jaamacadda Nugaal xarumaheeda ay ku leedahay magaaladda Laascaanood ee gobolka Sool. Imtixaankan oo ah imtixaan sanadeedka jaamacadda ayaa sida uu sheegay guddoomiyaha jamacadda, C/risaaq Maxed Aadan (Lafoole) uu ka duwan yahay imtixaandaadkii ka horreeyey isagoo xusay inay ugu talogaleen qaab loo kordhinayo aqoonta iyo tayada ardayda jaamacada ka qalin-jebinaysa.

2013-01-12 1:25 AM EST
Sabti, Jannaayo 12, 2013 (HOL) — Xukuumadda dalka Ingiriiska ayaa shaacisay inay matigelinayso sannadkan shir looga hadlayo arirmaha dalka Soomaaliya, waxaana shirkan uu daba-socdaa shirkii lagu qabtay London bishii Feberaayo ee sannadkii hore kaasoo socday hal maalin loogana hadlay arrimaha Soomaaliya.

2013-01-12 1:03 AM EST
Sabti, Jannaayo 12, 2013 (HOL) — Guddoomiyihii bankiga dhexe ee dalka Jabuuti, Jaamac Maxamuud Xayd ayaa xalay ku geeriyooday isbitaalka Aga Khan ee magaalada Nairobi halkaasoo maskaxda looga qalay.

2013-01-12 12:46 AM EST
Sabti, Jannaayo 12, 2013 (HOL) — Iska-horimaad culus ayaa xalay saqdii dhexe ku dhexmaray deegaanka Buulo-mareer ee gobolka Shabeellada Hoose ciidammo watay diyaarado kuwa qumaatiga u kaca ah iyo xoogagga Al-shabaab, iyadoo dagaalkaas uu dhaliyay khasaare nafeed oo soo kala gaarta labada dhinac.