Hiiraan Online

 

Khamiis, December 19, 2024 (HOL) - Ciidamada dowladda fedaraalka Soomaaliya oo kaashanaya kuwa Daraawiishta Galmudug iyo dadka deegaanka ayaa gacanta ku dhigay laba baabuur oo siday Shidaal iyo agab kale oo lagu tuhmay in loo wado kooxda Al-shabaab.

Saraakiisha hoggaamineysay howlgalkaan ciidamadu kusoo qabteen labada gaari ayaa sheegay in baaritaano ay ku socdaan ragii watay gawaaridaan loo maleynayo iney u socdeen dhanka Al-shabaab.

“Khawaarijta ayaa culeysyadii ugu adkaa ku wajahaysa deegaanada Galmudug, Ciidanka Xoogga dalka, kuwa deegaanka iyo Darawishta Galmudug ayaana ku guuleystay xakameynta dhaq dhaqaaq kasta ee ku wajahan Goobaha gabaadka ay ka dhigteen argagixisadu” ayaa lagu yiri qoraal kooban oo kasoo baxay Taliska ciidanka Xoogga.

Ciidamada dowladda iyo kuwa dadka deegaanka ayaa sidaan oo kale marar badan horay gacanta ugu dhigay gawaari kooxda Al-shabaab u siday Shidaal iyo agabyo kale.

Ugu dambeyntii howlgalkaan ayaa kusoo aadaya, iyadoo maalmihii la soo dhaafay ciidanka xoogga dalka iyo kuwa dadka deegaanka ay ka wadeen howlgalo ka dhan ah kooxda Al-shabaab deegaano iyo degmooyin ka tirsan maamulka Galmudug.