3/29/2024
Today from Hiiraan Online:  _
Wararka Maanta- Talaado, Jan 8 , 2013
Haweenka ku jira Xeryaha Barakacyaasha Muqdisho oo ka cabanaya Kufsi ay u geystaan Ciidamada Dowladda Soomaaliya


Talaado, Jannaayo 08, 2013 (HOL) — Iyadoo madaxweynaha Soomaaliya, Xasan Sheekh Maxamuud uu dhawaan sheegay in askarigii kufsi lagu helo uu xukunkiisu noqonayo dil toogasho; ayaa haddana haweenka ku jira xeryaha barakacayaasha ee Muqdisho ku yaalla waxay ka cabanayaan kufsi ay u geystaan ciidamada dowladda Soomaaliya iyo dad xiran dharka ciidamada.

Nuuro Xirsi oo 27-jir ah waxay sheegtay in 29-kii bishii December ee lasoo dhaafay ay xilli habeen ah kufsadeen toddoba askari oo hubeysan, kuwaas oo ay sheegtay inay ugu soo dhaceen guri cooshado ka sameysan oo ku yaalla xero ku taalla Tarabuunka oo ka tisran degmada Hodan.

“Waxay ahayd 1:00 habeennimo, caruurteydu way jiifeen markii ay toddoba nin oo hubeysan ay guriga iigu soo dhaceen dabadeedna ay si xun ii kufsadeen,” ayay Nuuro u sheegtay Telefishinka Al-Jazeera oo ay wareysi siisay.

“Askartu qaarkood waxay ku hubeysnaayeen qoryaha AK-47. Dharbaaxo ayay igu dhufteen waxayna igu amreen inaan guriga dibadda uga baxo, kaddibna way i kursadeen. Wax walba oo ay awoodi kareen ayay igu sameeyeen. Lama aanan dagaalami Karin ama iskama difaaci Karin. Sideen ula dagaalami karaan toddoba qof oo hubeysan,” ayay hadalkeeda raacisay.

Haweeneydan dhibanaha ah waxay sheegtay inaysan jirin cid caawisay intii la kufsanayay. “Dadku way ka baqaan inay guryahooda kasoo baxa xilliga habeenkii ah si ay u arkaan waxa dhacaya. Qof walba waa baqayay, waayo waxay doonayaan inay noolaadaan.”

“Markii ay iga tageen raggii i kufsanayay, waan iska ooyay  Waaberigii ayaan isbitaal aaday waxaana la iga soo siiyay dawooyin, umana aanan sheegin wax walba oo igu dhacay. Waayo waa Soomaali mana doonayo inay dadku i ogaadaan,” ayay hadalkeeda raacisay.

Nuuro waxay sheegtay inay tagtay saldhig booliis balse aan waxba laga qaban dhibaatadii loo geystay. “Muqdisho dadka waa la dilaa aniguna ma aanan dhiman. Kufsigana wax weyn looma arko, xirtaa cidna looma xiro. Dadka ku nool kaamamka barakacayaasha ma ahan kuwo la xiiseeyo, ma aqbalayo wax walba oo aan ku iraahdo, xitaa haddii aan warbaahinta ka hadlo la ima maqlayo.”

Fartuun Cabdisalaam Aadan oo ka mid ah aasaasayaashii ururka gabahaha walaalaha Soomaaliyeed oo la aasaasay sannadkii 2010 ayaa u sheegay Al-jazeera inaan la inkiri karin in kufsigu uu ka dhaco Muqdisho, iyadoo xustay in weli uu meesha ka maqan yahay sharcigii wax looga qaban lahaa arrintan foosha xun.

“Kufsigu weli waa dhibaato taagan, si kasta oo ay ahaataba, toddobaad walba waxaa xafiiskeenna yimaada in ka badan toddoba dhibbane oo lagula kacay kufsi,” ayay tiri Fartuun C/salaam oo intaas ku dartay: “Kaamamku kuma yaallaan guryo, buushashkuna ma lahan albaabbo. Ninka waqtiguu rabo ayuu soo geli karaa wuxuu doono ayuuna ka sameyn karaa,” ayay tiri Faruun C/salaam.

Dowladda Soomaaliya ayaan weli waxba ka qaban dhibaatooyinka kufsiga ah ee lagula kaco haweenka Soomaaliyeed, gaar ahaan kuwa ku jira xeryaha barakacayaasha ee ku yaalla Muqdisho.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
1/8/2013 4:54 PM EST
Talaado, January 08, 2013(HOL): Wiil Soomaali ah oo ku jiray xabsi ku yaalla magaalada Lecce ee dalka Talyaaniga, halkaasi oo loogu xiray in uu ku soo qaato ciqaabta dembi xatooyo ah oo lagu helay ayaa isdaldalay kaddib markii ay xaalad nolol xumo ah ay xabsiga kula soo gudboonaatay.

1/8/2013 12:12 PM EST
Talaado, Jannaayo 08, 2013 (HOL) — Wasiirka gaashaandhigga Soomaaliya, C/xakiin Maxamuud Xaaji Fiqi ayaa sheegay in dalal kasoo horjeeda nabad ka dhalata Soomaaliya ay taageeraan burcadbdeedda Soomaaliya, kuwaas oo raadinaya inaysan Soomaaliya weligeed xasilin oo aanay deggenaasho ka dhicin.

1/8/2013 12:11 PM EST
Talaado, Jannaayo 08, 2013 (HOL) — Ergayga xoghayaha guud ee Qaramada Midoobay uga wakiilka ah arrimaha Soomaaliya, Danjire Augustine Mahiga oo kulan la qaatay madaxweynaha Soomaaliya, Xasan Sheekh ayaa sheegay in Qaramada Midoobay ay qaab cusub kula shaqeyn doonto dowladda federaalka Soomaaliya.

1/8/2013 8:50 AM EST
Talaado, Jannaayo 08, 2013 (HOL) — Kulan ay magaalada Muqdisho ku yeesheen ergayga Midowga Afrika u qaabilsan Soomaaliya iyo madaxda dowladda Soomaaliya ayaa waxaa lagu gaaray go’aan lagu dalbanayo in la kordhiyo xilliga howgalka ciidamada Midowga Afrika ee AMISOM.

1/8/2013 7:56 AM EST
Talaado, Jannaayo 08, 2013 (HOL) — Kulan cashooyinkii lasoo dhaafay uga socday deegaanka Dan-dan madaxdhaqameed ku kala dhex-jirey beelo isku maan-dhaafay dhul daaqsimeed la magaaleeyay oo lagu magacaabo Xamar-lagu-xidh oo 40-km dhinaca Koonfur-bari kaga beegan Degmada Buuhoodle ayaa ga`aammo lagaga soo saaray.

1/8/2013 7:54 AM EST
Talaado, Jannaayo 08, 2013 (HOL) — Golaha aqoonyahannada Koonfurta Soomaaliya oo mudooyinkii ugu dambeeyay wadday barnaamij la magac baxay [qiimee qofkaaga] ayaa munaasabad uu soo qaban-qaabiyey golaha kana dhacday hoteel Manchester ee magaalada Baydhabo waxaa shahaadooyin lagu guddoonsiiyay shirkado iyo hay’ado wadani ah oo ka jira gobolka Bay.

1/8/2013 6:59 AM EST
Talaado, Jannaayo 08, 2013 (HOL) — Guddiga cadaalladda Somaliland ayaa isku shaan-dheyn ballaaran ku sameeyay guddoomiyeyaasha maxkamaddaha goboladda Somailland qaarkood.

1/8/2013 6:52 AM EST
Talaado, Jannaayo 08, 2013 (HOL) — Mudanayaasha golaha Wakiiladda Somaliland, ayaa maanta cod aqlabiyad ah ku ansixiyey wasiirka Dib u jinta Somaliland Mr: Saleebaan Ciise Axmed (Xaglo Toosiye) iyo wasiir ku xigeenka macdanta, Tamarta iyo biyaha Somaliland Mr: Cabdisalaan Maxamed Xasan.

1/8/2013 5:57 AM EST
Talaado, Jannaayo 08, 2013 (HOL) —Maamulka culumaa’udiinka Ahlusunna Wal-jameeca ee gobolka Gedo ayaa sheegay in dagaalladii ugu danbeeyay ee ka dhacay gobolkaasi ay ku guuleysteen in ay xoogagga Al-shabaab kala wareegaan dhul ballaaran oo ay uga sugnaayeen gobolkaasi.

1/8/2013 5:46 AM EST
Talaado, Jannaayo 08, 2013 (HOL) — Dowladda Talyaaniga oo muddo dheer gumeysanaysay gobollada Koonfureed ee Soomaaliya ayaa shaacisay inay ka caawin doonto dowladda cusub ee Soomaaliya tababarka ciidamada iyo wax-soo-saarka.

1/8/2013 1:21 AM EST
Talaado, Jannaayo 08, 2013 (HOL) — Ciidamada AMISOM ee ku sugan magaalada Baydhabo ee xarunta gobolka Bay ayaa lagu wareejiyay garoonka diyaaradaha ee Baydhabo, halkaasoo tan iyo bishii Feberaayo ee sannadkii hore ay gacanta ku hayeen ciidamada Itoobiya ee caawinaya kuwa dowladda Soomaaliya.

1/8/2013 1:20 AM EST
Talaado, Jannaayo 08, 2013 (HOL) — Afar qof oo ay ku jiraan saddex sarkaal oo ka tirsan saraakiisha booliiska Kenya iyo qof rayid ah ayaa ku dhaawacmay bambaano lagu weeraray xalay gaari ay wateen booliiska Kenya oo marayay bartamaha magaalada Gaarisa ee xarunta gobolka Waqooyi-bari-Kenya.