Xildhibaan ka tirsanaa Baarlamaanka Soomaaliya oo Muqdisho lagu dilay

Axad, 31 July 2011(HOL): Xildhibaan ka tirsanaa Baarlamaanka Soomaaliya oo lagu magacaabi jiray Khaliif Jire Warfaa ayaa goor dhaweyd lagu dilay caasimadda Soomaaliya ee Muqdisho.

Xildhibaanka oo lagu dilay Degmada Xamarweyne ayaa waxaa dilkiisa geystay rag bastoolado ku hubeysan, kuwaasi oo baxsaday markii ay dilka geysteen kaddib. Meesha Xildhibaanka lagu dilay waxaa ka dhow Saldhigga Booliska qeybta Bartamaha Xamar, mana suurtagelin in ciidamada halkaas ku sugan ay qabtaan raggii dilka geystay.

Dad goob-joogayaal ah ayaa HOL u sheegay in Xildhibaanka lagu dilay agagaarka Masjidka Marwaas, isagoo markii la dilayay masjidkaas ku soo tukaday Salaaddii Maqrib. Xildhibaanka ayaa la sheegay in uu ku socday Hotel uu deganaa oo  lagu magacaabo novecento (900).

Degmada Xamar-weyne ee Xildhibaanka lagu dilay ayaa waxay tahay meel ay si weyn gacanta ugu heyso Dowladda Soomaaliya, waxaana inta badan degan Xildhibaannada baarlamaanka Soomaaliya iyo weliba shaqaalaha kala duwan ee Dowladda. Sidoo kale degmada Xamarweyne ayaa muddooyinkan dambe waxaa loo soo raray ganacsigii Suuqyada Bakaaraha iyo Suuq Bacaad, kaddib markii uu xumaaday ammaanka labadaas Suuq.

Waa Xildhibaankii ugu horreeyay oo ka tirsan Dowadda Soomaaliya oo lagu dilo Magaalada Muqdisho muddo sanad iyo xoogaa ah, wuxuuna dilkiisa ku soo beegmayaa iyadoo maalmihii aynu ka soo gudubnay ay Muqdisho ka socdeen dagaallo u dhaxeeya Dowladda Soomaaliya iyo Xarakada Al-Shabaab, iyadoo ay xusid mudan tahay in dagaalladan ay dowladda ku qabsatay dhul baaxad leh oo ay horay uga talineysay Xarakada Al-Shabaab.

Dhawaan waxaa qarax miino lagu dilay Wasiirkii Arrimaha gudaha Soomaaliya C/shakuur Shiikh Xasan Faarax, iyadoo ka sii horna Muqdisho iyo Beledweyne lagu dilay wasiirro ka tirsanaa dowladda Soomaaliya.

Salaad Iidow Xasan (Xiis), Hiiraan Online
[email protected]