Hiiraan Online

Jimco, January 24, 2025 (HOL) - Taliyaha Hay’adda Nabadsugidda iyo Sirdoonka Qaranka Soomaaliyeed ee NISA Cabdullaahi Maxamed Cali Sanbaloolshe ayaa degmada Buula burte ee gobolka Hiiraan ka wado kulamo lagu dardar galinayo wajiga labaad ee howlgalada ka dhanka Al-shabaab.

Taliye Sanbaloolshe oo maalmahii lasoo dhaafay ku sugnaa halkaas ayaa qaar ka mid ah waxgaradka degmada Buula Burte kala hadlay sidii ay uga qeyn qaadan lahayeen dib u bilaabashada dagaalka dalka looga xureynaayo Al-shabaab.

Waxgaradka degmada Buula burte ee kulanka la qaatay Agaasimaha Hay’adda Nabadsugidda iyo Sirdoonka Qaranka Cabdullaahi Maxamed Cali Sanbaloolshe ayaa dhankooda cadeeyay iney dowladda ku garab taagan yihiin dib u bilaabashada dagaalada ka dhanka ah kooxda.

Bilowgii bishaan ayay aheyd markii si rasmi ah loogu wareejiyay amniga guud ee gobolka Hiiraan Taliye Sanbaloolshe iyo masuuliyiin kale oo uu ka mid ahaa Wasiirka Batroolka iyo Macdanta Soomaaliya Daahir Shire, kuwaas oo ku guuleystay xal u helista xiisad ka taagneyd Baledweyne iyo qaadista Isbaarooyin tiro beel ah oo yaalay inta u dhaxeysa Baledweyne iyo Matabaan.

Ugu dambeyntii Taliye Sanbaloolshe ayaa haatan ku howlan dardar galinta wajiga labaad ee howlgallada ka dhanka ah Al-shabaab iyo sidii kooxda looga xureyn laha deegaannada ay ka joogaan guud ahaan gobolka Hiiraan.