Hiiraan Online

Isniin, November, 11, 2024 (HOL) - Wararka ka imaanaya degaanada Koofur Galbeed ee Soomaaliya ayaa sheegaya in Ciidanka Daraawiishta Koofur Galbeed Soomaaliya ee Degmada Qasaxdheere ay howgal ay ka fuliyeen tuulada Weel-manaas oo 15km u jirta Degmada Qansaxdheere ku dileen ilaa 6 Dagaalyahano iyo horjoogayaashii la socday.

Saraakiisha howlgalkaan hogaaminaysa ayaa u sheegay warbaahinta Dowladda in howlgalka ka dhacay Qansaxdheere ay ku dileen horjoogayaal ka tirsan Al shabaab  kuwaasi oo kala ah Nuur Keerow Xaydar iyo Sheegow Aadan Macalin.

Labadaan horjooge ayaa Al shabaab ugu qaabilsanaa Qansax dheere Cunaqabateenta magaalada iyo lacagaha sida baadda ah looga soo qaado Shacabka ku nool Degmadaasi sida ay saraakiishu xuseen.

Sidoo kale saraakiishaan ayaa shaaca ka qaaday in howlgalka Qansax dheere looga soo furtay Al shabaab hub iyo 3 mooto Faaykon.

Maalmihii ugu dambeeyay Degaanada Koofurta Galbeed waxaa ka socday howlgallo ka dhan ah Al shabaab oo ay wadeen ciidanka Xooga dalka iyo kuwa Koofur Galbeed Soomaaliya.