Sabti, January, 6, 2024 (HOL) - Madaxweynaha dowladda Fedaraalka Soomaaliya Xasan Sheekh Maxamuud ayaa markale si adag uga hadlay heshiiska Somaliland ay la gashay dowladda Itoobiya ee la xariiray in Itoobiya ay hesho qeyb ka mid ah Biyaha Soomaaliya.
Madaxweyne Xasan Sheekh ayaa sidoo kale sheegay in dhulka Soomaaliya horay loo diiday in dad ajnabi ah ay ku dhashaan oo ay wax ka sheegtaan, islamarkaan aan la aqbali Karin waqtigan oo lagu jiro qarniga 21-aad in dhul ka mid ah Soomaaliya la bixiyo.
“Walaalayaal Itoobiya ma idin aqoonsan karto ee Dhulka Yuusan na dhaafin oo sabab ha u noqonina oo taariikhda xun haku galinina, war Dhulkaan waa Dhulkii Awooweyaasheennu diideen in naag (Haweenay) Anjabi ah ku umusho oo uu wax ku sheegto, Sidaan uu bay Itoobiya Badda u rabtay balse Ingiriiskii ayaa diiday, Dhulka Daaqsinta ah ee naga baxay asbaabta uu u baxay waxaa talo ku lahaa kuwo Soomaali ah oo aan fiicnayn oo dano yar ka dhex arkay Cadawga” Madaxweynaha Soomaaliya Xasan Sheekh Maxamuud.
Madaxweynaha ayaa ugu baaqay Itoobiya iney nabadgalyo kula noolaato dalalka dariska la ah oo ay dhowrto madax banaanida dhuleed si la mid ah sida ay u dooneyso Itoobiya inaan loo faraglin dhulkeeda.
"Dhulka Soomaaliya cid bixi karta ma jirto, xitaa in laga wadahadlo ayaa dembi ah, ma bixi doono dhulkaas, cid qaada kartana ma jirto. Itoobiya ma aqoonsan karto Somaliland, xitaa haday aqoonsadaan waxaba uma gasho ee waxaan leyahay reer Somaliland taariikh xun haku gelina arrintaan oo dhulka hana dhaafina" ayuu yiri Madaxweyne Xasan Sheekh.
Wuxuu sidoo kale xusay madaxweyne Xasan sheekh in waxyaabaha laga wada hadlo ama lagu midoobi karo ineysan qeyb ka aheyn dhulka, islamarkaana uusan aheyn mid socon kara damaca dowladda Itoobiya ku dooneyso dhul ka mid ah Soomaaliya.
“Aduunyada Masaalix ayaa lagu heshiiyaa oo lagu wada noolaadaa balse Dhulka ama Dad Kama mid ahan, Annaga iyo Itoobiya waa la garanayaa oo xuduud rasmi ah oo laga heshiiyay nagama dhaxayso, Dowladda Itoobiya waxa aan leeyahay Dadkii ha qaldinina oo ha u sheegina bad ayaan ka helnay Soomaaliya ha dhihina ma dhacayso, shalay ma dhicin maanta ma dhacayso” ayuu yiri Madaxweyne Xasan Sheekh Maxamuud.