Sabti, April, 6, 2024 (HOL) - Warsaxafadeed kasoo baxay dowladda Fedaraalka Soomaaliya ayaa faahfaahin dheeraad ah looga bixiyay weerar kooxda Al-shabaab aroornimadii hore ee saakay ay ku qaaday degmada Balcad ee gobolka Shabeellaha Dhexe.
Weerarka kooxdu ku qaaday degmada Balcad ayaa ahaa mid ku bilaawday qaraxyo xoogan oo uu xigay dagaal fool ka fool ah oo halkaas ku dhexmaray Al-shabaab iyo ciidanka dowladda.
Warka kasoo baxay dowladda Soomaaliya ayaa lagu sheegay in weerarka laga hortagay oo ay fashiliyeen ciidanka dowladda, islamarkaana qaraxyada kooxdu ay ka dhaceen meel banaan ah.
“Ciidamada geesiyaasha ah ayaa ka hor tegay dhagartaas, waxaana meel cidlo ah ku qarxay gaarigii cadowgu damacsanaa inuu ku dhibaateeyo shacabka, kaasoo loo soo ekeysiiyey gaari rakaab ah. Guryo ay lahaayeen dad shacab ah ayaa ku burburay qaraxaas la fashiliyey, mana jirto wax dhimasho ah oo soo gaartay shacabka, marka laga reebo dhaawacyo fudud oo soo gaaray saddex askari oo fashilisay dhagarta kooxda” ayaa lagu yiri warsaxaafadeedka kasoo baxay dowladda.
Dhinaca kale Taliyaha ciidanka dhulka ee Xoogga dalka Soomaaliyeed Jeneraal Dayax Cabdi Cabdulle oo shir jaraa’id u qabtay Warbaahinta ayaa sheegay in weerarka saakay khasaare lagu gaarsiiyay kooxda Al-shabaab, islamarkaana aysan wax u dhicin sidii ay wax u rabeen kooxdu.
"Dhagarta Khawaariijta maalmaha bisha barakeysan ay soo abaabulayeen oo saakay kula soo kala heen degmada Balcad waa la fashiliyay oo ciidanka ayaa ka hortagay oo ku cibaadeystay" ayuu yiri Taliye Dayax Cabdi Cabdulle.
Taliyaha ayaa sidoo kale ugu baaqay dhalinyarada ka barbar dagaalameysa kooxda Al-shabaab in wali dowladda ay sii neyso fursad cafis ah oo ay isku soo dhiibi karaan.
"Dhalinyarada Khawaariijta qaladay waxaan leyahay waxad heystan fursad dowladda idin siisay ee isa soo dhiiba dadkiina iyo dowladiina idiin baahan ee ka faa'ideysta" ayuu yiri taliye Dayax Cabdi Cabdulle.
Ugu dambeyntii weerarkii saakay ka dhacay degmada Balcad ayaa la xaqiijiyay in lagu dilay 11 xubnood oo ka mid ahaa xubnahii Shabaab ee weerarka kusoo qaaday degmada, sida uu warbaahinta u xaqiijiyay gudoomiyaha degmadaas Qaasim Furdug.