Isniin, September, 18, 2023 (HOL) - Dowladda Itoobiya ayaa beenisay guulo kooxda Al-shabaab ay ka sheegatay dagaal Shalay galinkii hore ku dhexmaray ciidamadeeda iyo kuwa Al-shabaab deegaano ka tirsan gobolka Bakool ee maamulka Koonfur Galbeed.
Dagaalka ayaa ahaa mid dhabagal ah oo kooxdu ku sameysay laba kolanyo oo ka tirsan Militariga Itoobiya oo ku kala wajahna magaalooyinka Waajid iyo Xudur, islamarkaana kasoo ambabaxay deegaanada Yeed iyo Ceel Barde ee isla gobolka Bakool.
Dagaaladaas dhabagalka ayay kooxda Shabaab sheegatay in ciidanka Itoobiya ay kaga dishay 167 askari oo itoobiyaan ah, islamarkaana ay ku gubeen gaadiid dagaal oo ciidankaasi uu watay.
Safiirka dowladda Itoobiya u jooga Soomaaliya Mukhtar Maxamed Waare ayaa Warbaahinta u sheegay inuu baraha bulshada uu ku arkay sheegashada Al-Shabaab, isagoona ku tilmaamay sheegashadooda mid dacayaad ah oo aan waxba ka jirin.
“Waa ay isku dayi karaan [inay weeraraan ciidamada Itoobiya] balse xitaa 10 daqiiqo rasaas kuma ridi karaan ciidamada difaaca Itoobiya, ciidankani waa kuwo xirfad leh waana kuwa aad u qalabaysan, aadna u abaabulan, mar walbana si adag ayay u garaacaan marka ay iska hor imaadaan Al-Shabaab, marka tani waa dacaayad kaliya, ma ahan wax ka badan dacaayad ka dhan ah Itoobiya iyo ciidamada difaaca Itoobiya” ayuu yiri Danjire Mukhtaar Maxamed Waare.
Safiirka Itoobiya ee Soomaaliya Mukhtaar Maxamed ayaa sidoo kale beeniyay warar sheegayay in ciidamada Itoobiya ee Shalay weerarka ku qabsaday Bakool inay yihiin kuwa aan ka tirsaneyn howlgalka ATMIS oo si sharci daro ah kuso galay gudaha Soomaaliya.
" Waxaan Soomaaliya ku joognaa go’aannadii Midowga Afrika iyo beesha caalamka ee lagu taageerayo dowladda sharciga ah ee Soomaaliya iyo dadaalka ay ugu jirto sidii dalkan nabad looga dhalin lahaa, Marka, tani waa dacaayad kaliya oo ay afuufayaan Al-Shabaab oo inta badan lagu yaqaanno" ayuu yiri Danjire Mukhtaar.
Si kastaba ha ahaatee dowladda Itoobiya waxaa Soomaaliya ka jooga kumanaan askari oo qeyb ka ah howlgalka ATMIS, waxaasa la tilmaama in mararka qaar ciidamo Itoobiyaan ah oo aan ka mid aheyn howlgalka ATMIS iney kasoo talaabaan xaduuda ay wadaagaan Soomaaliya iyo Itoobiya.