Wararka Maanta: Jimco, Feb 10, 2023-Ciidanka Booliiska oo gacanta ku dhigay rag kaarar been abuur ah ku dhacayay Barakacayaasha ku nool duuleedka Muqdisho

Ciidanka Booliiska oo gacanta ku dhigay rag kaarar been abuur ah ku dhacayay Barakacayaasha ku nool duuleedka Muqdisho

Jimco, February, 10, 2023 (HOL) - Ciidamada Booliiska Saldhiga degmada Dharkeenleey ee gobolka Banaadir ayaa gacanta kuso dhigay rag burcad ah oo kaarar been abuur ah ku dhacayay dadka barakacayaasha ah ee ku nool duuleedka magaalada Muqdisho.

Ragaan ay gacanta kusoo dhigeen Booliiska degmada Dharkeenleey oo ah sadax ruux ayaa war qoraal ah oo kasoo baxay Taliska Booliiska gobolka Banaadir lagu sheegay iney dadka barakacayaasha u sheegayeen iney ka socdaan hay'adda ka shaqeeya arrimaha gargaarka.

Sadaxdaan nin ayaa la sheegay in qoysaska barakacayaasha ah qoyskiiba ay ka qaadayeen lacag dhan $10 doolar, islamarkaana ay siinayeen kaarar been abuur ah ay ugu sheegayeen iney ku qaadan doonaan lacago ama raashiin.

Ragaan burcada ah ayaa lagu xiray Saldhiga ciidamada Booliiska degmada Dharkeenleey ee magaalada Muqdisho, kuwaas oo la sheegay in lasoo taagi doono Maxkamad.

Magaalada Muqdisho ee Caasimada Soomaaliya waxaa mudooyinkii dambe kusoo kordhayay burcada sida xirfadeysan u dhacda ganacsatada iyo shacabka Soomaaliyeed.

Hiiraan Online