Isniin, Luulyo, 3, 2023 (HOL) - Wasiirka Wasaaradda Awqaafta iyo arrimaha Diinta ee Soomaaliya oo ku sugan Magaalada Barakeysan ee Makka al-mukarama ee Sacuudi Carabiya, ayaa ka hadlay caqabadihii ay la kulmeen Xujeyda Soomaaliya ee Sannadkan ku soo gutay Acmaasha Xajka.
Wasiir Roobow ayaa sheegay in Xujeyda Soomaaliyeed ee sannadkan geeriyootay ay yihiin 4 ruux oo kala ah labo dumar ah iyo labo Rag ah, waxa uu sidoo kale tilmaamay in ay lumeen 4 Xaaji, isla markaana ay rajeynayaan in waqti dhaw la helo.
Waxa uu xaqiijiyay in ay jiraan 60 Xaaji oo xanuunsatay, isla markaana dadaal dheer kaddib intooda badan Caafimadeen.
“ Sannadkan Xujeyda Soomaaliyeed ee soo Xajisay, waxa ay ahayeen tiradooda 11,650 Xaaji, waxaa jiray Soomaali kale oo meel kale ka yimid, kuwaas oo noo yimid, laakiin inta ay Dowladda ogtahay waa tiridii aan idin sheegay, waxaan rajeyneynaa in si nabad galyo ah dalka dib loogu celin doono Xujeyda Soomaaliyeed” ayuu yiri Wasiirka Awqaafta iyo arrimaha Diinta ee Soomaaliya Muqtaar Roobow
Waxa uu xaqiijiyay in ay jirtay cilad yar oo soo wajahday Xujeyda Soomaaliyeed inta ay ku gudajireen Acmaashka Xajka, taasi oo ah in Basaskii qadayay ay soo yara daheen, balse markii dame la xaliyay sida uu hadalka u dhigay Wasiir Roobow.
Sikastaba 1.8 milyan oo Xujaay ah oo ka kala yimid daafaha Caalamka ayaa Sannadkan Xajiyay, sida ay sheegtay Dowladda Boqortooyada Sacuudi Carabiya.