Khamiis, Luulyo, 27, 2023 (HOL) - Shirka Todobaadlaha ee Golaha Wasiiradda Xukuumadda fedaraalka Soomaaliya oo uu Maanta shir guddoomiyay kusimaha Raysal wasaaraha ahna Wasiirka Caddaaladda iyo Dastuurka Xasan Macalin Maxamuud ayaa looga hadlay xaalada guud ee amniga dalka, weerarkii ugu dambeeyay ee ka dhacay Kuliyada Jaalle Siyaad iyo arrimo kale.
Kulanka Golaha Wasiiradda waxaa sidoo kale Maanta lagu ansixiyey hindise sharciyeedyo muhiim u ah dalka, waxaana Golaha ay dhageysteen warbixino la xariira guulaha ciidanka xoogga dalka Soomaaliya ay ka gaareen howlgalo ka dhan ah la dagaalanka Al-shabaab oo ka dhacay qaar ka mid ah gobolada dalka.
Shirka Golaha Wasiiradda ayaa sidoo kale lagu cambaareeyay weerarkii Al-Shabaab ay geysteen xerada Kuliyadda ciidanka Jaalle siyaad ee ku taala magaalada Muqdisho.
"Golahu wuxuu tacsi u diraya umadda Soomaaliyeed, qoysaskii iyo eheladii ay ka shahiideen geesiyaasha Ciidanka Xoogga Dalka ee ku shahiiday weerarkaasi, iyagoo islamarkaana Allah uga baryey inta dhaawacantey inuu Ilaahay deg deg u caafiyo" ayaa lagu yiri qoraal kasoo baxay kulanka.
Kulanka Todobaadlaha ayaa sidoo kale lagu meel mariyey hindise Sharciyeedyo dhowr ah oo kala ah, Hindise Sharciyeedka Xuquuqda Naafada Soomaaliyeed, Hindise Sharciyeedka Hay’adda Adeegga Baaritaanka iyo Sharciyeeynta Beeraha Soomaaliyeed, Hindise Sharciyeedka Xakameynta Kiimikooyinka Beeraha Soomaaliyeed, Hindise Sharciyeedka Abuurka iyo Noocyada Dhir-beereedka, Hindise Sharciyeedka Badbaadada Dhir beereedka iyo Takoorka iyo Xeer Nidaamiyaha Cunaqabateynta Maaliyadeed ee Cayiman.
Kulanka Maanta ee Golaha Wasiiradda Soomaaliya ayaa kusoo aadaya, iyadoo safar shaqo dalka ay kaga maqan yihiin Raysal Wasaaraha Xukuumadda Fedaraalka Soomaaliya Xamse Cabdi Barre iyo ku xigeenkiisa Saalax Axmed Jaamac, kuwaas oo shirar muhiim ah uga qeybgalaya dalalka Tansaaniya iyo Ruushka.