Talaado, Agoosto, 8, 2023 (HOL) - Waxaa magaalada Bloomington lagu soo gabagabeeyay tartankii Quraanka,
kaas oo maamulka North America Imamu shaatibi ay qabtaan sanad walba.
Tartankaan sanad laha ah ayaa lagu qabtay labada magaalo, ee Burnsville
iyo Bloomington oo ka wada tirsan Gobolka Minnesota. Tartankan ayaa soo
maray heerar kala duwan, balse hadda maraya meel aad u sarreysa.
Gabar
yar oo Soomaali ah ayaa gashay kaalinta koobaad ee qaybta 30-ka jus oo
ku guuleysatay tartankii Imamu Shaadhibi, meesha dhinaca wiilasha 30-ka
juz uu ku guuleystay Imran Duka, oo ka yimiday gobolka New Jersey.
Yusra
Abdurahman Abdillle ayaa masrax ay fadhiyaan kummanaan muslimiin ah
hortooda lagu guddoonsiiayay furaha gaari cusub oo soo baxay sanadkan
2023, noociisuna uu yahay Toyota Camry oo Soomaalidu ay aad u qaataan.
Waa
fursad taariikhi ah inuu shahaadada guusha guddoonsiiyay Yusra, Sheikh
al-muqri Ahmed Ciise al-Macsaraawi oo ka mid ah culumada caalamka ugu
sarreysa dhinaca aqoonta Quraanka iyo culuumtiisa.
Yusra
Abdurahman Abdille, waa gabar yar oo Somali-Mareykan ah oo ka timid
gobolka Washington, ee dalka Mareykanka. Waxay ku guulaysatay kaalinta
koobaad ee tartanka Quraanka Kariimka sanadkaan 2023-ka, ee Waqooyiga
America Imamu Shadhibi, kaasoo shalay la soo gabagabeeyay kaddib
toddobaad markuu ka socday goblka Minnesota, oo ay Soomaalidu ku xooggan
yihiin.
Kaddib markii natiijada la shaaciyay ayay Yusra
nooga warrantay dareenkeeda. “Alxamdu liLaah! Ilaahay aan ku mahadinaa”,
ayay tiri Yusra. Sidoo kale, waxa ay sheegtay inay dhiirrigelinta ugu
badan ay ka heshay waalidkeed oo ay sheegtay inay in badan la dadaaleen.
Iyadoo qof walba uu isweydiin karo gabadh yar oo ku
dhalatay dalkaan Mareykan inay ku guulaysato kaalinta koobaad ee 30-ka
juz ee Quraanka, ayaa haddana aaney la dhayalsan karin dadaalka
macallimiinta Quraanka iyo waalidka ardayda tartanka ka qayb qaadata
sanad walba.
Fatuma Qasim, hooyada Yusra, ayaa bogga
galisay gabadheeda kaddib marka la guddoonsiiyay abaal-marinta. Hooyo
Fatuma Qasim ayaa Hiiraan Online uga warrantay dareenkeeda iyo dadaalkii
ay gelisay gabadheeda
guuleysatay. “Waa alxamdu liLaah”, ayay ku
celcelisay dhowr jeer. Sidoo kale, waxa ay sheegtay in gabadha aabeheed
uu dadaalka qayb weyn ku lahaa, oo uu u dadaalay Yusra oo markaan
kaliya aanan guuleysan.
Yusra hooyadeed Fatumo ayaa
sheegtay inay gabadheeda ku dhalatay Mareykanka, lakin tartammo Quraan
oo kale oo badan ay ku guuleyatay dhawr jeer.
Kulankaan
ayaa isu keenay dad ka kala yimidday meelo kala duwan, waxaana mideeyay
jacaylka ay u qabaan Quraanka. Jawiga goobtaan waxaa hareeyay qiiro iyo
xamaasad ay ku dheehan tahay dareen leh khushuuc iyo dhiirigelin dhif
iyo naadir ah. Waa tan natiijada ka dhalatay waalid ilmihhisa ku
taageeray xifdinta Quranka Kariimka ah.
Mohamud Dulyadeyn, Minnesota, USA
