Khamiis, Agoosto, 31, 2023 (HOL) - Hawlgalka Midowga Afrika ee ku meel gaadhka ah ee Soomaaliya (ATMIS) ayaa mar kale xaqiijiyey inay ka go’an tahay inay taageeraan hawlgallada milateri ee ay Soomaaliya hoggaaminayso ee ka dhanka ah Al-Shabaab, si loo xaqiijiyo nabadda iyo ammaanka Soomaaliya ka hor inta aan la gaadhin December 2024-ka.
"Hadafkeena, ATMIS ahaan iyo dhammaan daneeyayaasha howlgalkan, waa inaan aragno Soomaaliya oo ammaan ah, xasiloon, oo barwaaqo ah oo nabad kula nool iyada iyo adduunka intiisa kale," Taliyaha Ciidanka ATMIS Lt. Gen. Sam Okiding ayaa sheegay intii uu socday. Shir jaraa’id oo oo lagu qabtay Xarunta ATMIS ee magaalada Muqdisho.
Wajigii koowaad ee dhimista ee la soo afjaray bishii June, ATMIS waxay kala baxday 2000 oo askari waxayna Dowladda ku wareejisay lix saldhig oo ay horey uga hawlgeli jirtay iyadoo la raacayo Qaraarka Golaha Ammaanka ee Qaramada Midoobay 2628 iyo 2670 (2022).
Si wada jir ah Qaramada Midoobay iyo Dowladda Federaalka Soomaaliya (DFS), ATMIS ayaa horey u soo gaba gabeeyay qiimeyn farsamo oo lagu sameeyay wajigii koowaad, waxaana hadda la diyaarinayaa in 3000 oo askari oo dheeraad ah in laga saaro Soomaaliya.
Talooyinka qiimeynta farsamada ayaa la horgeyn doonaa Golaha Ammaanka ee Qaramada Midoobay 31ka Agoosto, iyadoo la filayo in macluumaad dheeraad ah oo ku saabsan u diyaargarowga wejiga labaad la filayo 15ka Sebtembar.
Bixitaanka 3000 askari oo ah wajiga labaad ayaa la filayaa in la soo gabagabeeyo dhamaadka bisha Sebtembar, sida ku cad qaraarka Qaramada Midoobay ee tirsigiisu yahay 2687.
Lt. Gen. Okiding ayaa ku bogaadiyay ciidamada ATMIS howlgalada militari ee ay iska kaashanayaan ciidanka Dowladda, kuwaas oo ka socda gobolka Galgaduud.
Geesta kale, taliyaha Ciidanka Xoogga, ayaa ku booriyay beesha caalamka in ay sii wadaan taageeridda geeddi-socodka nabadda ee meelaha muhiimka ah oo ay ka mid yihiin abuurista ciidamada, qaadista cunaqabateynta hubka, kobcinta awoodda, iyo bixinta dhaqaale xal waara u noqon kara ATMIS iyo DFS.
Wuxuu ku bogaadiyay Ciidanka Xoogga Dalka Soomaaliyeed (XDS) oo ku guuleystay inay la wareegaan lix Saldhig oo Horudhac ah (FOB) oo bishii June lagu wareejiyay, isagoo xusay in ATMIS ay sii wadi doonto taageerada hannaanka kala guurka ah ee ay Soomaaliya hormuudka ka tahay, taasoo ugu dambeyn ay ku wareejin doonto mas’uuliyadda amniga oo dhameystiran. dhamaadka sanadka soo socda.