3/29/2024
Today from Hiiraan Online:  _
Wararka Maanta- Jimco, May 6 , 2022
Ururka Somalia Debates oo sheegay in ay dhici doonto dooda musharraxiinta madaxweynaha Soomaaliya

Jimco, May, 6, 2022 (HOL) - Wasaaradda Warfaafinta Xukuumadda Federaalka Soomaaliya ayaa hakisay dood loo qaban lahaa musharraxiinta xilka madaxweynaha Soomaaliya, oo ay soo qaban-qaabinayeen ururka aan dowliga aheyn ee Somalia Debates.

Wasaradda ayaa go’aankeeda ku macneysay in Somalia Debates aysan heysan sharciyad warbaahineed oo ay dooda ku qabtaan, waxna ku tebiyaan, balse war-saxaafadeed kasoo baxay ururka ayaa lagu sheegay in Somalia Debates aysan aheyn hay’ad warbaahineed oo lagu maamulo nidaamka iyo xeer hoosaadka Wasaaradda Warfaafinta Federaalka.

Somalia Debates ayaa taas beddelkeeda caddeysay in fasax iyo oggolaansho ay ka heystaan Wasaaradda Arrimaha Gudaha, Federaalka iyo Dib-u-heshiisiinta, (lambarka NGOD/Moifar0065/22). Waxaa ay intaasi raaciyeen in ay yihiin urur aan dowli aheyn oo diiwan-gashan, hadafkooduna yahay abaabulka wada-hadalka iyo doodaha bulshada rayidka ee Soomaaliya oo dhan.

“Soomaalia Debates hadafkeedu waa in bulshadu qeyb ka noqoto siyaasadda, iyadoo laga doodayo danta guud. Taasina waa danta qaranka, sharciga iyo diiwankana waxaan u marnay wadadii saxda ahayd, waanu ku sii socon doonaa sida qorshuhu yahay. Soomaalia Debates waxay og tahay inay jiraan kooxo wata dano khaas ah oo aan doonayn in Doodaha Musharixiinta Madaxweynaha ee Soomaaliya aysan dhicin, danahaas oo ah dano gaar ah, mid siyaasadeed iyo mid xirfadeed – waana inaan qofna loo oggolaan inuu ka leexiyo danaha iyo ajendaha fog ee Soomaaliya ee ku wajahan Waddada Dimuqraadiyadda iyo Doodaha caafimaadka leh”.

Ugu dambeyntii ururka aan dowliga aheyn ee Somalia Debates ayaa sheegay in qorshahooda ku aadan dooda musharraxiinta madaxweynaha ay taageero buuxa uga heystaan shacabka Soomaaliyeed, Xafiiska Ra’iisul Wasaaraha Soomaaliya, qaar ka mid ah xubnaha beesha caalamka, FEIT, NIEC iyo musharrixiinta u taagan xilka madaxweynaha oo dhamaantood gacmo furan ku soo dhaweeyay hindisaha Somalia Debates.

Hassan Istiila, Hiiraan Online
[email protected]













Click here
5/6/2022 11:23 AM EST
Jimco, May, 6, 2022 (HOL) - Wasiirkii hore ee Warfaafinta Dowladda Federaalka Soomaaliya Mudane Cabdukhaadir Xussen Maxamed Jaahweyn, ayaa xalay magaalada Muqdishu ku shaaciyay in uu yahay musharrax u taagan xilka Madaxweynaha Jamhuuriyadda Federaalka Soomaaliya.

5/6/2022 11:06 AM EST
Jimco, May, 6, 2022 (HOL) - Dowladda Fedaraalka Soomaaliya ayaa weydiisatay hay'adda IMF inay dib ugu dhigto muddo saddex bilood oo dheeraad ah qiimeyn dib u habeynta barnaamijkeeda dhaqaalaha, kaasi oo muddeysan 17-ka bishan May oo ku beegan laba maalmood kadib xiliga doorashada Madaxweynaha cusub ee dalka Soomaaliya.

5/6/2022 7:26 AM EST
Jimco, May, 6, 2022 (HOL) - Guddoomiyaha Golaha Shacabka Sheekh Aadan Maxamed Nuur ayaa Maanta hoygiisa kulan kula qaatay qeybaha kala duwan ee Ururadda bulshada rayidka ah, kaasoo looga hadlay kaalinta ay ururada bulshada rayidka ah ka qaadan karaan arrimaha doorashada madaxweynaha dalka oo lagu wado iney dhici doonto 15-ka bishaan May.

5/6/2022 6:50 AM EST
Jimco, May, 6, 2022 (HOL) - Dagaalamayaal ka tirsan Al-shabaab ayaa Maanta weerar madaafiic ah ay ku qaadeen Saldhig ciidamada Burundi ay ku leeyihiin tuulada Miirtaqawo oo u dhaw deegaanka Ceelbaraf ee gobolka Sh/dhexe.

5/6/2022 3:55 AM EST
Jimco, May, 6, 2022 (HOL) - Dowladda Mareykanka ayaa si adag u cambaareysay weerarkii 3-dii bishaan ka dhacay deegaanka Ceelbaraf ee gobolka sh/dhexe, kaasoo dagaalyahano ka tirsan Al-shabaab ay ku qaadeen Saldhig ciidamada Burundi ee ka mid ka ah howlgalka Midowga Afrika ee ATMIS ay ku leeyihiin deegaankaasi.

5/6/2022 1:10 AM EST
Jimco, May, 6, 2022 (HOL) - Guddiga doorashada maamulka Hirshabeelle ayaa xalay magaalada Jowhar ee xarunta gobolka Sh/dhexe ku qabtay doorashada labadii kursi ee ugu dambeysay kuraasta ku dhineyd Hirshabeelle, islamarkaana aheyd guud ahaan labada kursi ee ka harsaneyd kuraasta Golaha Shacabka.

5/6/2022 1:07 AM EST
Jimco, May, 6, 2022 (HOL) - Guddoomiyaha Golaha Shacabka Sheekh Aadan Maxamed Nuur oo ay weheliyaan guddoomiye ku xigeenka 1-aad ee Golaha Aqalka Sare Cali Shacbaan Ibraahim iyo guddoomiye ku xigeenka 2-aad ee Golaha shacabka Cabdullaahi Cumar Abshirow ayaa kulan la qaatay gudigga Isku dhafka ah ee qabanqaabada Doorashada madaxweynaha Soomaaliya.