12/8/2022
Today from Hiiraan Online:  _
Wararka Maanta- Jimco, Aug 12, 2022
Madaxweynaha Soomaaliya oo Caawa war kasoo saaray rabashadahii ka dhacay magaalooyin ka mid ah Somaliland
 

Jimco, Agoosto, 12, 2022 (HOL) - Madaxweynaha dowladda Federaalka Soomaaliya Xasan Sheekh Maxamuud ayaa Caawa ka hadlay rabashadahii Shalay ka dhacay qaar ka mid ah magaalooyinka Somaliland, isagoona ku baaqay in xasilloonida, nabadda iyo wadajirka ay ku tilmaaman yihiin hoggaanka siyaasadda iyo shacabka Somaliland inay dhowrtaan.

Madaxweyne Xasan Sheekh ayaa ugu baaqay Xukuumadda, Mucaaradka iyo Bulshada reer Somaliland inay wadahadal ku xaliyaan muranka ka taagan doorashada Somaliland ee sababay rabashadaha ay ka dhasheen dhimashada iyo dhaawaca gaaray dadka rayidka ah ee banaanbaxayay.

“ Walaalayaal dhexdiina is xaliya, waxaan aad uga digeyaa inaadan gaarina meel dibadda la idinka soo farageliyo, meel Soomaali kale ay idin kaga timaado aad u baahataan, waxaa kaliya uga baaqsan kartaan waxaa ay tahay in aad wada fadhiisataan oo wada hadashaan oo aad dhowrataan wadajirka iyo nabadda aad ku tilmaaman tihiin oo aan idinkaga dayano” ayuu yiri Madaxweyne Xasan Sheekh.

Hadalkaan Caawa kasoo baxay madaxweynaha dowladda Soomaaliya ayaa imaanaya xili Shalay qaar ka mid ah deegaanada Somaliland ay ka dhaceen dibadbaxyo ka dhan ahaa Xukuumadda madaxweyne Muuse Biixi Cabdi, kuwaas oo xoogooda ka dhacay magaalooyinka kala ah Hargeysa, Burco iyo Ceerigaabo, waxaana dibadbaxyadaasi ay sababeen dhimasho iyo dhaawac gaaray dadka mudaaharaadayay oo kasoo horjeeday mudo kororsi ku yimaada doorashada madaxtinimada Somaliland.

Jamaal Cali Cabdi, Hiiraan Online
[email protected]












Click here
8/12/2022 1:45 PM EST
Jimco, Agoosto, 12, 2022 (HOL) - Raysal waasaraha Xukuumada Feradaalka Soomaaliya Xamse Cabdi Barre oo goordhaw ka hadlay rabashadahii ka dhacay deegaano ka tirsan Somaliland ayaa ugu baaqay shacabka iyo masuuliyiinta Somaliland in wadahadal iyo is afgarad ay ku dhameeyaan xiisada siyaasadeed ee ka jirta deegaanada Somaliland, kadib banaanbaxyadii rabshadaha watay ee shalay ka dhacay magaalooyin ka mid ah Somaliland oo ay ku dhinteen dad shacab ahaa.

8/12/2022 11:19 AM EST
Jimco, Agoosto, 12, 2022 (HOL) - Madaxweynaha dowlad degaanka Soomaalida Mustafe cagjar ayaa maanta isbeddel ku sameeyay Taliska Ciidanka Liyuu Booliska degaanka Soomaalida.

8/12/2022 10:21 AM EST
Jimco, Agoosto, 12, 2022 (HOL) - Wararka ka imaanaya dowlad degaanka Soomaalida ayaa sheegaya in magaalada Cundhufo oo maalmihii u dambeeyay uu ka socday dagaal u dhaxeeyay Soomaali iyo Canfar ay maanta si buuxda ugu gacan gashay maleeshiyaadka Canfarta.

8/12/2022 5:41 AM EST
Jimco, Agoosto, 12, 2022 (HOL) - Hal qof oo Soomali ah oo rag ah ayaa ku geeriyooday mid kalena wuu ku dhaawacmay kadib markii rag hubaysan ay rasaas ku fureen qabuuraha Richmond Hill, halkaas oo ay ka socotay aaska wiil dhallinyaro Soomaali ah oo todobaadkan lagu dilay magaalada Toronto.

8/12/2022 5:17 AM EST
Jimco, Agoosto, 12, 2022 (HOL) - Taliska ciidanka Booliiska Soomaaliyeed oo Xalay howgalo culus ka sameeyay qeybo ka mid ah degmooyinka magaalada Muqdisho ayaa soo bandhigay tiro Mooto Bajaajyo ah oo ay sheegeen in lasoo dhacay.

8/12/2022 4:04 AM EST
Jimco, Ogosto, 12, 2022 (HOL) - Madaxweynaha Somaliland Muuse Biixi Cabdi, ayaa dusha u saaray xisbiyada mucaaradka ah eeda khasaarihii ka dhashay muharaadkii Khamiista, wuxuuna mucaaradka ku eedeeyay in ay qas a buureen si ay uga baxsadaan tartanka urrurada siyaasada.

8/12/2022 2:12 AM EST
Jimco, Agoosto, 12, 2022 (HOL) - Xildhibaan Maxamed Xasan Murjaan oo ka mid ahaa Xildhibaanadii 7-dii bishaan buuqa iyo fowdada ka dhex sameeyay fadhigii Baarlaamanka Soomaaliya ay ku ansixinayeen Golaha Wasiiradda Xukumadda Soomaaliya ayaa raali galin ka bixiyay falkii uu kula kacay guddoomiyaha Golaha Shacabka.

8/12/2022 12:15 AM EST
Jimco, Agoosto, 12, 2022 (HOL) - Tartanka Qur'aanka Kariimka ee Waqooyiga Ameerika, ayaa lagusoo gabagabeeyay magaalada Minnesota ee dalka Maraykanka, waxaana abaal marino lagu gudoonsiiyay tartamayaashii ugu sareeyay.

8/12/2022 12:12 AM EST
Jimco, Ogosto, 12, 2022 (HOL) - Qoraal ay si wadajir ah usoo saareen waddamada Faransiiska, Denmark, Finland, Germany, Norway, Sweden, Boqortooyada Ingiriiska, Maraykanka iyo Midowga Yurub, ayaa mucaaradka iyo muxaafadka Somaliland ugu baaqay in ay xaalada dajiyaan.